Prokuradór Jeráll da Repúblika, José Ximenes. Imajen /Egas Cristovão

DILI, 12 maiu 2020 (TATOLI)—Prokuradór Jerál Repúblika (PJR), José da Costa Ximenes, ohin, atualiza situasaun Estadu Emerjénsia (EE) ba Prezidente Repúblika kona-ba servisu urjénsia sira iha Ministériu Públiku (MP) ne’ebé funsiona nafatin tuir deliberasaun Konsellu Superiór Ministériu Públiku nian.

Nia hatutan, iha enkontru mensál ne’e MP atualiza hela informasaun ba fulan marsu ho abríl nian liuliu kona-ba atividade kriminál durante estadu emerjénsia ne’e.

“Apezar de iha prosesu lubuk ida mak tama, ita mós finaliza prosesu lubuk ida. Ida-ne’e atu dehan katak servisu turnu nian, servisu urjénsia sira iha Ministériu Públiku funsiona nafatin tuir deliberasaun Konsellu Superiór Ministériu Públiku nian. Balun tama dadeer no balun tama lorokraik, tanba ita laiha atividade ida ne’ebé maka suspende totál,” nia dehan Prokuradór Jerál Repúblika (PJR), José da Costa Ximenes, ba jornalista sira hafoin hala’o enkontru mensál ho Prezidente Repúblika, Francisco Guterres “Lú Olo”, iha Palásiu Prezidensiál Bairru Pité, Dili, tersa ne’e.

Nia hatutan, penál de kontas durante fulan marsu, iha Dili, rejista prosesu hamutuk 167 ne’ebé konsidera uitoan liu, prosesu hamutuk 205 mak rejistu durante estadu emerjénsia iha fulan abríl ne’ebé konsidera aas uitoan.

Tanba ne’e, nia sita katak totál iha fulan rua nia laran, prosesu entrada iha nível nasionál inklui gabinete Kombate Korrupsaun iha prosesu hamutuk 740.

Alende ne’e, nia dehan, iha fulan ne’e nia laran konsellu superiór delibera hodi majistradu sira bele halo servisu ba kazu sira ne’ebé konsidera urjente de’it, no mós finaliza prosesu sira ne’ebé presiza duni atu finaliza ho totál ne’ebé konsege termina iha fulan rua ne’e nia laran iha nível nasionál hamutuk 649 prosesu.

Kona-ba julgamentu sira ne’ebé urjente, nia hatutan, ba primeiru integrogatóriu ba arguidu detidu sira no julgamentu sumáriu sira mós, prokuradór sira iha nafatin.

Iha enkontru ne’e, nia aprezenta ba Prezidente Repúblika atividade kriminál iha loron 03 fulan maiu, bainhira mosu akontesimentu iha Liquiça-Maubara, prokuradór sira servisu hamutuk atu halo atuasaun ho lalais.

Kona-ba kazu Liquiça-Maubara, nia informa, agora arguidu iha ona prizaun preventiva inklui atividade kriminál servisu Ministériu Públiku hamutuk ho Diresaun Alfándega halo aprensaun ba kontentór lima ne’ebé nakonu ho bebidas alkólikas ho nia prosesu oras ne’e sei la’o hela.

Jornalista : Cipriano Colo

Esditór     : Cancio Ximenes

HAKEREK NO HATÁN

Please enter your comment!
Please enter your name here