Xefe Bankada CNRT, Duarte Nunes. Imajen/Egas Cristovão

DILI, 12 maiu 2020 (TATOLI)—Xefe Bankada Partidu Congresso Nacional da Reconstrução de Timor (CNRT), Duarte Nunes hateten, posilidade CNRT sei hatama tan petisaun ida ba Tribunál Rekursu (TR) kona-ba prosesu formasaun Governu ne’ebé durante ne’e deside hosi Prezidente Repúblika, Francisco Guterres ‘Lú Olo’.

“Ha’u rona de’it. Ha’u seidauk hetan kopia (desizaun TR). Maibé, ami iha ekipa legál ida ba situasaun ne’e. Sira sei haree tanba iha posibilidade atu hatama fila-fali ba iha ne’ebá (Tribunál Rekursu). Halo tiha plenária depois rekorre fila-fali, saida mak sira (ekipa legál) deside. Ha’u la hatene tanba sira sei estuda hela. Dalaruma iha intensaun atu hatama fali,” Xefe Bankada CNRT, Duarte Nunes, informa ba Agência TATOLI iha Resintu Parlamentu Nasionál, tersa ne’e.

Nia esplika, se intensaun atu hatama tán sei hahú prosesu ne’e iha Parlamentu Nasionál tuir proposta hosi baluk-lima ida (1/5) ho deliberasaun aprovadu tuir maioria baluk-tolu rua (2/3) hosi deputadu hotu-hotu iha plenária Parlamentu Nasionál, bazeia ba Konstituisaun RDTL artigu 79 alínea 3.

Deputadu na’in-18 afirma iha karta petisaun ne’e konsidera Prezidente Repúblika Francisco Guterres ‘Lú Olo’ durante ne’e foti desizaun liga ho situasaun polítika iha rai-laran hamosu violasaun grave hasoru konstitusionál RDTL tuir artigu 79 alínea 2.

Tuir Konstituisaun RDTL artigu 79 (hatán ba krime no obrigasaun ba konstituisaun) alínea 2, hateten Prezidente Repúblika sei hatán ba Tribunál Supremu Justisa nian kona-ba krime ne’ebé akontese bainhira hala’o nia knaar no mós violasaun momoos no boot kona-ba nia obrigasaun Konstitusionál.

Maibé TR indefere petisaun ne’e tanba razaun sira kona-ba Prezidente Repúblika, Francisco Guterres ‘Lú Olo’, halo violasaun ne’e obrigasaun konstitusionál maibé tenke liuhosi Parlamentu Nasionál hodi hetan apresiasaun hosi membru deputadu 2/3.

Juis ne’ebé prezide prosesu ne’e mak hanesan Deolindo dos Santos, Maria Natércia Gusmão no Jacinta Correia da Costa. Juis na’in-tolu ne’e indefere petisaun ne’e iha loron segunda ne’e.

Notísia Relevante: TR Indefere Pedidu Membru Bankada CNRT, Tilman : “Ha’u Sei Haree Loron-Ida Ka Rua Tan”

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here