Prokuradór Jeráll da Repúblika, José Ximenes. Imajen /Egas Cristovão

DILI, 12 maiu 2020 (TATOLI)–Prokuradór Jerál Repúblika (PJR), José da Costa Ximenes, deklara prontu atu ajuda halo lei Cyber Crime bainhira Governu ka Parlamentu Nasionál (PN) husu ninia ajuda.

Nia hato’o prontidaun ne’e, durante enkontru mensál ho Prezidente Repúblika (PR), Francisco Guterres “Lú Olo”, iha Palásiu Prezidensiál Bairru Pité, Dili.

“Ohin, ha’u informa ba Prezidente Repúblika katak Ministériu Públiku (MP) prontu ajuda atu halo projetu ida kona-ba Cyber Crime no bainhira Pralamentu Nasionál husu ajuda ba ida ne’e, Prokuradór Jerál Repúblika prontu atu ajuda,” dehan Prokuradór Jerál Repúblika (PJR), José da Costa Ximenes, ba jornalista sira.

Nia dehan, oras ne’e iha mídia sosiál (facebook), ema balun ho identidade falsa tenta atu trata aat ema, halo buat oin-oin entaun tuir analiza katak Timor-Leste iha ona kondisaun ne’ebé bele halo aprovasaun kona-ba lei Cyber Crime.

Tanba, nia hateten, buat ne’ebé akontese iha mídia sosiál katak ema halo ho forma organizadu no kontra sosiukulturál Timor-Leste nian.

“Ha’u hanoin, ida ne’e ita presiza haree ho sériu. Ha’u-nia pontu de vista katak dalaruma tempu ona atu ita mós kanaliza informasaun sira ne’e, hanesan krime. Ne’e pontu de vista prokuradór Jerál Repúblika nian. Dalaruma ema bele ataka ha’u, ha’u laiha problema. Maibé, ita-nia problema ne’e maka, ita-ninia lei ne’e tenke proteje ita-nia sidadaun sira. Ita-nia lei sira tenke refleta ita-nia sosiukulturál sosiedade ninian, ne’ebé uluk dezde ita-nia bei-ala sira sempre respeita malu. Ita tenke mantein ida-ne’e,” nia dehan tan.

Prokuradór ne’e husu ba Governu no Parlamentu Nasionál atu haree asuntu ida ne’e ho urjente tanba ema barak uza sala demokrásia no liberdade espresaun.

“Ha’u hanoin Governu ka Parlamentu Nasionál tenke haree ida-ne’e. Ita labele utiliza demokrásia, liberdade espresaun atu destroi. Tanba ema ida atu konstroi ninia imajen no reputasaun la’ós iha loron ida de’it. Ohin ema barak preokupa no ha’u ko’alia daudaun ne’e la’ós atu defende A ka B maibé defende rai ida ne’e,” nia hateten tan.

Nia konfesa, nia hanesan ema ida ne’ebé respeita tebes liberdade espresaun maibé importante iha ohin loron katak tenke eduka sosiedade atu hatene respeita lider sira, hatene respeita malu, ida-ne’e mak importante.

“Dala ida tan, ha’u nia preokupasaun la’ós pesoál maibé hanesan Prokuradór Jerál Repúblika. Haree katak, sasán sira-ne’e ema halo la’ós hanesan sasán ne’ebé ema la gosta malu mak halo maibé halo tanba ho forma organizadu. Ida-ne’e mak ita labele admite,” nia preokupa.

Antes ne’e, autoridade seguransa mós identifika no detein sidadaun balun ne’ebé uza identidade falsa iha mídia sosiál (facebook) hodi trata no tolok líder sira iha nasaun ne’e, inklui Xefe Estadu Maior FALINTIL Forsa Defeza Timor Leste (F-FDTL), Majór Jenerál Lere Anan Timur.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here