Diretór Jerál Estatístika, Elias dos Santos Ferreira, Imajen Tatoli/Egas Cristovão

DILI, 12 maiu 2020 (TATOLI) – Iha biban hasoru malu ho Primeiru-Ministru (PM), Taur Matan Ruak, Diretór Jerál Estatístika, Elias dos Santos Ferreira, relata kona-ba Índise Presu Konsumidór (IPK) durante períodu Estadu Emerjénsia ligadu ho surtu COVID-19 iha Timor-Leste.

Tuir dadus ne’ebé aprezenta, presu sasán merkadoria iha territóriu normál.

“Ha’u relata sensu estatístika ne’ebé kada fulan ami sempre publika Índise Presu Konsumidór, hatudu mai katak presu iha merkadu sira iha Dili laran no munisípiu sira laiha inflasaun ida boot. Tanba ne’e maka ha’u hanoin presu merkadoria ne’e la’o normál hela no ita mós hakarak presu ne’e normál atu populasaun bele hola hahán, se lae ema dehan tanba COVID-19 maka sosa foos barak maibé realidade presu normál hela”, informa Diretór Elias Ferreira hafoin enkontru ho PM Taur iha Palásiu Governu, tersa ne’e.

Relasiona ho presu mundiál ne’ebé tun maibé Timor-Leste nia laiha mudansa, tuir nia presiza adapta ho mudansa globál.

“Ha’u fó sujestaun katak bainhira presu mundiál tun, ita mós tenke tun. Tanba ne’e mak Primeiru-Ministru husu mai ami atu publika nafatin dadus ne’e kada fulan”, nia akresenta.

Diretór Jerál ne’e relata Xefe Governu katak atividade balu iha tinan-2020, Diresaun Jerál Estatístika (DGE, sigla portugés) labele realiza, liuliu sensu populasaun no uma-kain ho razaun katak Orsamentu Jéral Estadu (OJE) 2020 laiha no adia ba 2021.

Aleinde ne’e, atividade balun mós DGE sei suspende hela tanba surtu COVID-19, maibé bainhira atividade la’o normál filafali mak bele realiza atividade hanesan peskiza emprezariál.

Tuir mudansa IPK fulan-marsu 2020 ne’ebé publika iha 21 abríl, hatudu katak iha mudansa persentajen IPK husi grupu hotu ba kada mensál sa’e (porsentu +0,3) ba fulan-marsu 2020, kompara ho fulan fevereiru 2020 tun (porsentu -0,1).

Mudansa presu husi grupu hotu (porsentu +0,3%) tamba hetan kontribuisaun husi grupu hahán no bebida La’os alkohólika (porsentu +0,5), no ekipamentu no manutensaun mobiliáriu uma laran (porsentu +0,9), grupu transporte (porsentu -0,4) no uma (porsentu -0,1) sai hanesan mudansa kontráriu ba inflasaun grupu hotu.

Hahan no Bebida la’ós alkohólika sa’e hetan impaktu maioria husi sub-grupu modo tahan (porsentu +1,5), mina no bokur (porsentu +0,7), susuben, keju no manu-tolun (porsentu +0,8), ai-fuan (porsentu +1,2), no foos (porsentu +0,1).

“Presu foos sa’e iha fulan ida ne’e tamba afeta husi presu fooS importasaun ne’ebé hatudu iha presu foos mundiál sa’e porsentu 9 iha trimestrál dahuluk tinan-2020. Iha parte seluk, presu mina mundiál mós tun porsentu 19 iha trimestrál dahuluk iha tinan-2020 hodi afeta presu mina-rai iha rai-laran ne’ebé tun iha fulan-marsu 2020”, refere nota husi DGE.

Mudansa persentajen IPK anuál sa’e (porsentu +0,2) kompara fulan-marsu 2020 ho marsu 2019, ne’ebé hetan kontribuisaun husi grupu hahá n no bebida la’ós alkohólika (porsentu +0,3), edukasaun (porsentu +2,6), ekipamentu no manutensaun mobiliáriu uma-laran (porsentu +0,2), hatais no sepatu (porsentu +1,5) no rekreasaun no kultura (porsentu +0,2). alkohol no tabako (porsentu -0,5), uma (porsentu -1,4) no komunikasaun (porsentu -0,5) sai hanesan mudansa kontráriiu ba anuál marsu 2020.

Inflasaun Tradable sa’e (porsentu +0,4) no Non-Tradeable laiha mudansa (porsentu 0,0) iha mensál kompara fulan-marsu 2020 to’o fevereiru 2020.

Inflasaun Tradable sa’e (porsentu +0,2) no Non-Tradeable sa’e (porsentu +0,3) iha anuál kompara fulan-marau 2020 to’o marsu 2019.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here