Portavóz CIGC no Koordenadór Forsa Tarefa Prevensaun no Mitigasaun ba Pandemia COVID-19, Sergio Lobo. Imajen Tatoli/Egas Cristovão

DILI, 12 maiu 2020 (TATOLI) – Portavóz Sala Situasaun, Sentru Intergadu Jestaun Krize (CICG, sigla Portugés), Sergio Lobo, hateten Ministériu Saúde (MS) daudaun halo hela vijilánsia sindrómika no sentinela iha munsípiu 12 inklui Rejiaun Admnistrativa Oé-cusse Ambeno (RAEOA), tanba ne’e apela ba komunidade atu partisipa ho másima iha atividade ne’e.

Teste ne’e hala’o liuliu ba ema ne’ebé hatudu sintoma respiratóriu iha fasilidade saúde sira.

Tuir dadus provizóriu husi minisípiu sira katak MS foti ona amostra hamutuk 515, ne’ebé kompostu husi suspeitu 63 no vijilánsia 452 no husi totál ne’e rezultadu negativu hamutuk na’in-133.

“Husu ba komunidade atu fó partisipasaun másima ba atividade vijilánsia ida ne’e, tanba ho aprosimasaun ativa atu buka kazu hanesan daudaun maka CIGC halo liuhosi atividade Ministériu Saúde nian. Ita bele antisipa no prevene transmisaun moras COVID-19 iha rai laran antes moras ne’e fó susar ba ema ne’ebé sofre, ba família, no ba komunidade”, tenik Portavóz CIGC, Sergio Lobo liuhosi Konferénsia Imprensa iha Sentru Mídia COVID-19, iha Sentru Konvensaun Dili (CCD, Sigla Portugés), tersa ne’e.

Tuir Koordenadór Forsa Tarefa Prevensaun no Mitigasaun ba Pandemia COVID-19 ne’e, komunidade hotu tenke apresia inisiativa Governu, liuhosi CIGC ne’ebé identifika ativamente posibilidade transmisaun iha komunidade, tanba inisitiava ida-ne’e di’ak tebes atu hakotu tali transmisaun COVID-19 iha rai-laran.

“Nasaun barak uluk la halo, nune’e ikus mai selu presu karun tanba ema barak mak moras no ema barak mak mate, pior liu maka to’o agora sira seidauk bele kontrola situasaun”, nia adianta.

Nune’e, nia apela ba komunidade tomak atu partisipa iha atividade vijilánsia sindromika no sentinela ho dalan hakbesik-an ba fasilidade saúde bainhira hetan sintoma respiratóriu ruma.

Nune’e mós presiza prátika moris ijiene iha atividade loron-loron.

“Ami kontinua halo apelu ba populasaun tomak atu kontinua kumpre regra distansiamentu fíziku mínimu metru ida, tuur hakmatek iha uma, no evita halibur malu. Keta rona boatu no notísia husi fonte ne’ebé la loos, maibé no fiar de’it maka informasaun sira ne’ebé sai husi konferensia imprensa husi Sala Situasaun ne’ebé realiza  loron-loron no prátika ijiene pesoál, liuliu  fase liman bebeik no liman labele kona ba inus, matan ho ibun, uza máskara bainhira sai husi uma”, nia sujere.

Tuir Portavóz, esforsu atu mantein distansiamentu fíziku, ijiene pesoál, inklui fase liman beibeik mak sei bele hadok husi infesaun COVID-19.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here