Portavóz CIGC no Koordenadór Forsa Tarefa Prevensaun no Mitigasaun ba Pandemia COVID-19, Sergio Lobo. Imajen Tatoli/Egas Cristovão

DILI, 12 maiu 2020 (TATOLI) – Portavóz Sala Situasaun, Sentru Intergadu Jestaun Krize (CICG, sigla Portugés), Sergio Lobo, informa abitante na’in-6 ne’ebé sei baixa iha fatin izolamentu Vera Crúz, daudaun ekipa vijilánsia halo ona teste dahuluk no husi rezultadu hatudu na’in-haat negativu no sei kontinua halo teste daruak.

Tuir informasaun ne’ebé antes ne’e fó sai, ba kazu konfirmadu no provável tenke halo teste no bainhira hatudu rezultadu negativu dala-rua tutuir malu maka foin bele konsidera rekuperadu no sai husi fatin izolamentu.

“Kazu rekuperadu mantein nafatin 22, maibé ema na’in-neen daudaun ne’e iha izolomentu ho kondisaun di’ak hotu. Entre na’in-neen ne’e, na’in-haat maka teste dahuluk hatudu rezultadu negativu tiha ona no ita hein katak teste daruak mak negativu tan maka sira na’in-haat bele sai ona husi izolamentu”, informa Portavóz CIGC, Sergio Lobo liuhosi konferénsia imprensa iha Sentru Mídia COVID-19, iha Sentru Konvensaun Dili (CCD, Sigla Portugés), tersa ne’e.

Koordenadór Forsa Tarefa Prevensaun no Mitigasaun ba Pandemia COVID-19, adianta ba abitante na’in-rua seluk iha teste dahuluk sei hatudu pozitivu COVID-19 ne’ebé presiza hein tan iha tempu badak atu halo tan teste.

Enkuantu númeru abitante ne’ebé submete ona ba teste COVID-19 iha Laboratóriu Nasionál hamutuk ema na’in-952, hein rezultadu 147, komulativu kazu konfirmadu 24, kazu konfirmadu foun 0, negativu 781, númeru kazu baixa ema na’in-neen, numéru rekuperadu ona kompostu hosi konfirmadu 18, provável na’in-haat.

Ema ne’ebé sei iha konfinamentu obrigatóriu hamutuk 88, kompostu na’in-60 iha Dili no na’in-28 iha munisípiu, enkuantu auto-kuarentena hamutuk na’in-tolu iha Dili no iha munisípiu seluk laiha.

Sidadaun sira ne’ebé maka pasa ona kuarentena obrigatóriu no auto-kuarentena durante loron 14 hamutuk ema na’in-2.177, kompostu husi Dili ema na’in-1.701 no munisípiu na’in-476.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here