Prezidente Em Exercicio UDT Rudolfo Henrique Aparicio Hamutuk Sekretáriu Jerál no Atual Deputado (UDT), Francisco David Xavier Carlos, Komerasaun Tinan 46 Loron Moris UDT. Imajen/ Egas Cristóvão

DILI, 11 maiu 2020 (TATOLI)—Partidu União Democrática Timorense (UDT), ohin, halo ona loron moris 46 eziste iha Timor-Leste no ba futuru sei metin nafatin.

Partidu UDT harii iha loron 11 maiu 1974 no loron 11 maiu 2020 halo ona tinan 46. Selebrasaun loron moris moris ne’e ho tema “UDT Pasadu, UDT Prezente no UDT ba Futuru no Hakru’uk ba Konstituisaun RDTL”.

Prezidente UDT Ein-Ezersísiu, Rudolfo Henrique Aparício, aproveita komemorasaun loron Moris UDT nian tinan ida-ne’e Konsellu Superiór Polítiku UDT ho estrutura tomak hato’o parabéns ba Udetista hotu ne’ebé namakari iha territóriu nasionál no diáspora no ba simpatizante UDT tomak.

“Nu’udar partidu polítiku ne’ebé hamriik primeiru iha Timor-Leste, hato’o ba públiku katak UDT uluk, UDT agora, UDT bá futuru, metin nafatin, hakru’uk bá Konstituisaun RDTL ho baze nafatin ba prinsípiu demokrasia no Estadu de Direitu. Sei kontinua fó onra ba eroi pátria sira, respeita veteranu sira, lideransa Estadu no líder nasionál sira, forsa defeza/FALENTIL no PNTL, no fó esforsu tomak ba povu nia independénsia ba moris di’ak,” dehan Prezidente UDT Ein-Ezersísiu, Rudolfo Henrique Aparício, ne’ebé akompaña hosi Sekretáriu Jerál, Francisco David Xavier Carlos no estrutura nasionál sira liuhosi Konferénsia Imprensa, iha Sede UDT, Palapasso, segunda ne’e.

Nia husu ba Udetista tomak ne’ebé namakari iha territóriu Timor-Leste, atu tau prinsípiu hirak ne’e iha ida-idak nia neon, hahalok, no ida-idak nia dezempeñu ba moris. Hado’ok aan hosi tentativa atu hamonu Udetista sira ba polítiku nakukun ne’ebé atu kontra Konstituisaun RDTL no Lei hira vijénsia.

Tanba, nia dehan, UDT partidu primeiru ne’ebé hakarak lori Timor ba ukun rasik aan, partidu sivilizadu, partidu ne’ebé hakru’uk bá istória no kultura Timor-Leste. Partidu ne’ebé sei moos hosi má-administrasaun, korrupsaun tanba seidauk kaer Govemu durante Timor-Leste ukun-aan no partidu ne’ebé hakru’uk bá Konstituisaun RDTL, demokrasia no Estadu Direitu.

“Tan ne’e, Kompañeiru UDT tomak, keta ta’uk. Keta hakfodak. Keta subar-aan tanba UDT mós nu’udar partidu primeiru ne’ebé hamriik bá prinsípiu fundamentál ukun-rasik-aan hosi kolonializmu sira no invazór sira. Mai, ita sai hatudu aan ona ba Udetista antigu sira ne’ebé sei subar aan tanba ta’uk no hakfodak ho pasadu. Mai ita hatudu, envolve no kontribui bá dezenvolvimentu nasional hodi harre bá-oin “Honrar o Passado, Olhando o Futuro”, nia dehan.

Iha Selebrasaun loron UDT ba dala-46 ne’e, Konsellu Supriór Polítiku UDT ho nia estrutura tomak mós hakarak fó omenajen, onra bá vítima Guerra 1974 to’o 1999 bá oan-kiak no feto faluk Udetista sira namakari iha territóriu Timor-Leste laran tomak no diáspora.

Prezidente Em Exercicio UDT Rudolfo Henrique Aparicio. Imajen/ Egas Cristóvão

“Ho selebrasaun loron UDT ba dala-46 ne’e ita hametin ita-nia prinsípiu nu’udar Udetista tanba istória hatudu katak UDT defende prinsípiu demokrásia, unidade, independénsia no antí komunízmu iha Timor-Leste ne’ebé uluk iha 1975 UDT funu bá atu Timor sai país soberanu ida, independente, demokrátiku, ne’ebé UDT hamosu iha Movimenta para Unidade e Independéncia de Timor-Dili (MUITD), iha 13 agostu 1975,” nia hateten.

Nia dehan, UDT aproveita selebrasaun ne’e aprova hodi harohan ba vítima Guerra no eroi sira-nia klamar atu Nai Maromak haraik fatin kamanek iha kadunan santu iha lalehan.

Tuir nia, UDT no nia estrutura tomak to’o iha nível aldeia, hato’o bá públiku katak ho ezisténsia UDT tinan 46 ona. Afirma katak UDT kontinua metin nafatin no metin maka’as liután hanesan primeiru partidu polítiku iha istória Timor-Leste.

Partidu UDT mak defende Konstituisaun RDTL, demokrasia no Estadu de Direitu RDTL tanba hakarak hamutuk ho partidu sira seluk iha ámbitu pluralizmu partidária hodi lori povu Timor-Leste ba moris di’ak.

“Tempu to’o ona atu ita mós envolve aan hamutuk ho partidu sira seluk iha dezenvolvimentu nasionál hodi hadi’a povu nia moris di’ak. Nune’e, povu bele sai hosi ki’ak no mukit,” dehan Prezidente UDT Ein-Ezersísiu, Rudolfo Henrique Aparício.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here