Sekretáriu Estadu Komunikasaun Sosiál (SEKOMS), Merício Juvinal dos Reis Akara. Imajen Tatoli/Egas Cristovão

DILI, 11 maiu 2020 (TATOLI)- Sekretáriu Estadu Komunikasaun Sosiál (SEKOMS), Mericio Juvinal dos Reis “Akara”, ohin, realiza enkontru koordenasaun serbisu ho Diretór Polísia Sientífiku Investigasaun Kriminál (PCIC, sigla portugés), Vicente Fernandes Brito, Prezidente Autoridade Nasionál Komunikasaun (ANC), João Olívio Freitas, Prezidente Konsellu Imprensa (CI), Virgílio Guterres ho reprezentante operadór telekomunikasaun tolu, Timor Telecom, Telkomcel no Telemor, hodi diskute no elabora ezbosu lei kontra informasaun falsu   ka Fake News iha Timor-Leste.

Diskusaun ne’e, SEKOMS organiza hodi ezekuta mensajen Primeiru-Ministru, Taur Matan Ruak, inklui lideransa nasionál, konvensaun relijiozu, no sidadaun sira, ne’ebé preokupa durante ne’e sidadaun  ka ema balun lansa informasaun falsu hodi trata no prejudika dignidade lider nasionál sira iha média sosiál.

“Durante ne’e ita-nia lideransa sira, Igreja no povu mós preokupa kona-ba oinsá estadu atu kria lei ida kontra informasaun falsu sira ka Fake News hodi fasilita Instituisaun Estadu hanesan PCIC, inklui ANC, Konsellu Imprensa no operadór telekomunikasaun sira bele suporta hodi fó idea ba kriasaun proposta lei ne’e,” hateten Sekretáriu Estadu Mericio Akara ba jornalista iha Palacio do Governo, Dili.

Iha parte seluk, Sekretáriu Estadu Mericio dehan, durante periodu Estadu Emerjénsia (EE) tuir relatóriu PCIC sira konsege rejista kazu Fake News hamutuk 45 maka akontese iha Timor-Leste no husi kazu sira-ne’e PCIC labele prosesa autór sira tanba seidauk iha lei atu haree problema hirak-ne’e.

“Durante periodu Estadu Emerjénsia PCIC rasik konsege deteta Fake News ka informasaun falsu 45 iha situasaun emerjénsia sira hatene se maka halo ka lansa informasaun sira ne’e. Ne’e signifika, kapasidade Institusionál rekursu umanu iha tiha ona, agora ita presiza reforsa ho inisiativa lei bele mai husi Parlamentu no bele mai husi governu,” nia hatete.

Mericio Akara hatutan, iha tempu besik ekipa ne’ebé mensiona sei kontinua halo enkontru koordenasaun ba kriasaun ezbosu lei kontra informasaun falsu hodi aprezenta ba Konsellu Ministru bele diskute no haruka ba Parlamentu Nasionál atu haree.

Hataan kona-ba konteúdu hosi lei kontra informasaun falsu ne’e rasik, Sekretáriu Estadu Mericio Akara dehan, ekipa sei diskute kona ba lalauk para bele kriminaliza kualkér sidadaun bainhira lansa informasaun falsu ka hatún naran di’ak no dignidade lideransa Timor-Leste no lansa informasaun falsu sei hetan sansaun.

“Ita foin maka atu inisia no forma ekipa tékniku para halibur idea kona-ba fake news para ba oin ita bele dezenvolve informasaun hodi haree loloos informasaun iha ita-nia rain,” nia hatete.

Iha oportunidade ne’e SEKOMS kontinua apela ba jornalista no instituisaun mídia no asosiasaun mídia sira kontinua luta kontra informasaun falsu hodi fó informasaun ne’ebé loloos ba públiku.

 Jornalista  : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here