Deputada Bankada PLP, Maria Angelina Sarmento Lopes. Imajen/Egas Cristovão

DILI, 11 maiu 2020 (TATOLI)—Bankada Parlamentár Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO), espera Prezidente Parlamentu Nasionál, Arão Noé de Jesus da Costa Amarál, halo ajendamentu ba pedidu destituisaun.

Deputada Bankada PLP, Maria Angelina Sarmento Lopes, esplika rejimentu parlamentu prevee segunda no tersa-feira ne’e loron plenária nian la’ós halo fali iha komisaun ka bankada nian.

“Prezidente Parlamentu Nasionál abandona ona funsionamentu Parlamentu Nasionál. Iha semana kotuk bankada FRETILIN, PLP no KHUNTO hatama ona rekerimentu ba Prezidente Parlamentu Nasionál. Ita hein katak iha tempu besik prezidente parlamentu bele halo ajendamentu ba asuntu destituisaun ne’e,” dehan Maria Angelina Sarmento Lopes ba Agência TATOLI, iha resintu Parlamentu Nasionál, segunda ne’e.

Nia dehan, ohin deputadu sira hosi bankada PLP, PD, FRETILIN, KHUNTO mak iha sala plenária maibé deputadu sira hosi bankada CNRT mak la marka prezensa.

“Ida-ne’e signifika sira mak hakarak paraliza funsionamentu Parlamentu Nasionál no públiku bele hareee katak orsmamentu laiha. Deputadu sira lakohi hala’o sira-nia funsaun maibé kada fulan simu nafatin osan. Deputadu sira abandona tiha sira-nia responsabilidade maibé sira-nia dever hetan nafatin,” dehan Deputada PLP ne’e.

Deputadu Bankada KHUNTO, Luis Roberto. 

Entretantu, Deputadu Kmanek Haburas Unidade Nasionál Timor Oan (KHUNTO), Luis Roberto, husu ba Prezidente Parlamentu Nasionál atu ajenda ona pedidu destituisaun.

“Ami-nia hakarak loloos mak funsionamentu parlamentu la’o nafatin no labele abandona maibé ohin laiha plenária nafatin. Tanba hahú loron 05 fulan maiu to’o agora ne’e, seidauk iha ajenda ida atu halo plenária. Tanba ne’e, ami espera aban prezidente bele ajenda ona pedidu destituisaun ne’e,” nia hateten.

Pedidu destituisaun ne’e aprezenta hosi bankada tolu kompostu hosi FRETILIN, PLP no KHUNTO hatama iha loron 05 fulan maiu 2020.

Artigu 16.º- B4 (Destituição) alínea 1 ho versaun portugés, hateten o Presidente pode ser destituído em votação por escrutínio secreto, que tem lugar em sessão plenária, para a qual é requerida a presença de mais de metade dos Deputados em efetividade de funções.

Alínea 2 hosi artigu 16 dehan, o pedido de destituição, devidamente justificado, é apresentado em requerimento subscrito por um mínimo de dez Deputados, cuja votação é obrigatoriamente agendada para uma sessão plenária a ter lugar num prazo não superior a cinco dias.

Maibé artigu17.º (Competências do Presidente do Parlamento Nacional) alínea 1-d hateten, admitir ou rejeitar os projetos e as propostas de lei ou de resolução, os projetos de deliberação e os requerimentos, uma vez verificada a sua regularidade regimental, sem prejuízo do direito de recurso para o Plenário.

Rekerimentu hosi bankada tolu ne’e aban kompleta ona loron-lima. Prezidente Parlamentu Nasionál, Arão Noé de Jesus da Costa Amaral, seidauk pronunsia pedidu ne’e to’o ohin loron.

Notísia Relavante: Bankada FRETILIN, PLP no KHUNTO Hatama Ona Rekerimentu Destituisaun Ba Meza PN

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here