Deputada Maria Angelina Lopez Sarmento. Imajen Tatoli/Egas Cristóvão

DILI, 11 maiu 2020 (TATOLI)—Bankada Partidu Libertasaun Populár (PLP), Deputada Maria Angelina Sarmento Lopez, hateten konjuntura polítika atuál atu mantein VIII Governu ka atu forma IX Governu ne’e depende ba dinámika iha Parlamentu Nasionál.

“Kona-ba koligasaun foun depende ba konjuntura polítika iha meza (kompozisaun meza PN). Se iha tempu besik mak iha mudansa ba meza, mudansa ida-ne’e reflete ba atu oinsá viabiliza governu foun ida ne’ebé atu kontinua VIII Governu ka forma IX Governu depende ba dinámika ne’ebé sei akontese iha parlamentu tanba parlamentu mak hahoris Governu,” dehan Deputada Maria Angelina Sarmento Lopez, ba Agência TATOLI iha Resintu Parlamentu Nasionál, segunda ne’e.

Deputada PLP ne’e hateten, konjuntura polítika oras ne’e depende ba kompozisaun meza atuál tanba presiza iha mudansa mak bele viabiliza governasaun ida.

“Ne’ebé ita kalma lai. Iha semana ida-ne’e nia laran, sei akontese mudansa ruma iha parlamentu maka diretamente sei afeta mós Governu,” nia dehan.

Iha parte seluk, Deputada PLP ne’e hateten, oras ne’e CNRT hola ona pozisaun retira hosi Governu atuál tanba CNRT hatene katak iha ona konjuntura polítika foun.

“Primeiru-Ministru la husu sira rezigna-aan maibé orientasaun polítika partidu nian obriga sira atu sees, señor Primeiru-Ministru mós la impede. Konjuntura polítika ne’ebé mosu daudaun iha ona mudansa no CNRT sira sente katak sira ba hanesan membru Governu la’ós reprezenta sira-nia aan nu’udar ema independente maibé ba reprezenta partidu ida-ne’ebé kompostu hosi AMP ne’ebé mai hosi CNRT, PLP no KHUNTO,” nia dehan.

Entretantu, Kompozisaun meza Parlamentu Nasionál atuál kompostu hosi Prezidente Parlamentu Nasionál Arão Noé de Jesus da Costa Amaral hosi CNRT, Vise-Prezidente Parlamentu Nasionál Maria Angelina Sarmento Lopez hosi PLP, Segundu Vise-Prezidente Parlamentu Nasionál Luis Roberto hosi KHUNTO, Sekretária Meza Parlamentu Nasionál Maria Terezinha Viegas hosi CNRT, Vise-Sekretária Meza Parlamentu Nasionál Isabel Maria Barreto Freitas Ximenes hosi Bankada UDT/FM no Segundu Vise-Sekretária Meza Parlamentu Nasionál Regina Freitas hosi PLP.

Notísia Relavante: CNRT Deklara Retira Hosi VIII Governu

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here