Imajen Tatoli/Osória Marques.

DILI, 11 maiu 2020 (TATOLI)–Konsellu Imprensa (CI, sigla portugés) husu ba Meius Komunikasaun Sosiál sira ne’ebé eziste iha Timor-Leste atu hala’o ninia papél ne’ebé mak informativu no edukativu ho loloos hodi labele prodús no públika notísia sira ne’ebé ninia konteudu sensasionál no hamosu pániku iha sosiedade.

Prezidente CI, Virgílio da Silva Guterres, hateten jornalista ho mídia sira tenke redús pániku la’ós atu aumenta situasaun sai pániku liután ho konteudu notísia sira ne’ebé sensasionál no espekulativa hodi halo povu lahakmatek.

“Jornalista ho mídia iha atu ajuda redús pániku la’ós atu aumenta situasaun sai pániku liután. Bainhira mídia mós hamosu notísia sira ne’ebé sensasionál no espekulativa ida ne’e sei halo povu lahakmatek. Ezemplu, iha notísia ne’e dehan posibilidade ema ne’ebé infetadu pozitivu virus korona sei aumenta ka metadu hosi populasaun sei infetadu. Ida ne’e mak notísia ho konteudu sensasionál no espekulativa,” dehan Prezidente CI, Virgílio da Silva Guterres, ba jornalista sira iha ninia deskursu liuhosi konferénsia imprensa relasiona ho lansamentu Matadalan Reportajén ba COVID-19, iha salaun CI, Quintal Boot, Dili, segunda ne’e.

Imajen Tatoli/Osória Marques.

Atu labele kria notísia ho ninia konteudu sensasionál no hamosu pániku iha sosiedade, nia hatutan, Meius Komunikasaun Sosiál   sira tenke kumpre matadalan kobertura COVID-19 nian bainhira halo kobertura ba asuntu pandemia COVID-19 ne’ebé mak sai ameasa ba ema nia vida iha mundu.

Nia esplika, matadalan nu’udar regra morál no konduta hahalok nian ba meius komunikasaun hotu-hotu sira atu halo tuir, bainhira hala’o atividade jornalístiku no públika informasaun kona-ba COVID-19 nian.

“Matadalan reportajén ba Covid-19, foti valór no prinsípiu hirak ne’ebé kódigu étiku jornalístiku opta ona. Ezemplu, notísia tenke ‘cover both sides’ no jornalista sira mós tenke halo verifikasaun ba informasaun hotu-hotu no nia fonte informasaun sira antes publika,” nia dehan.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here