Portavóz CIGC, Odete Viegas. Imajen Tatoli/Egas Cristovão

DILI, 10 maiu 2020 (TATOLI) – Ministériu Saúde (MS) hamutuk ho Sentru Integradu Jestaun Krize (CIGC, sigla portugés), realiza vijilánsia sentinela hodi buka hatene karik iha ona transmisaun lokál COVID-19 iha komunidade, tanba to’o agora kazu konfirmadu maihusi sidadaun ne’ebé husi nasaun afetadu no hafoin to’o Timor-Leste tama kedan ba kuarentena obrigatóriu durante loron 14.

Prosesu ba realizasaun vijilánsia sentinela hala’o ona dahuluk iha loron 5 to’o 8 maiu no hahú loron 11 to’o 15 maiu sei hala’o ba daruak iha munisípiu sira.

Portavoz CIGC, Odete Viegas, hateten objetivu hosi vijilánsia sentinela maka atu buka tuir no hatene katak karik iha ona transmisaun lokál iha komunidade.

“Kona-ba sistema vijilánsia epidemologia no mós vijilánsia sentinela ne’ebé mak hala’o iha munisípiu hotu inklui mós Hospital Nacional Guido Valadares, ami-nia alvu ba ema sira ne’ebé mak iha sintoma respiratóriu aguda, tanba ema sira ne’e daudaun iha óspital sira no sentru saúde sira halo sistema triajen”, informa Portavóz CIGC liuhosi konferénsia imprensa ne’ebé hala’o iha Sentru Mídia COVID-19, iha Sentru Konvensaun Dili (CCD-sigla portugés), domingu ne’e.

Tuir atuál Diretora Prestasaun Saúde ne’e, ema ne’ebé maka sofre isin-manas, mear, inus-been, maka sei submete ba triajen no ema ne’ebé laiha sintoma sei submete ba konsulta baibain.

Odete Viegas adianta, faze dahuluk hatudu katak iha Munisípiu Ermera profisionál saúde sira halo triajen no hetan duni ema na’in-ualu mak submete ba hasai amostra.

Triajen ne’e halo iha óspital referál no ospitál nasionál rasik no mós ba komunidade ne’ebé iha sintoma.

“Iha óspital sira mós provavelmente ami sei halo ba pasiente sira ne’ebé baixa maibé iha sintoma, no mós ba profisionál saúde sira tanba sira mós halo hela atendimentu ba ema moras no sira mós bele submete ba iha kolleta sampel. Daudaun ne’e iha óspital nasionál no óspital referál Baucau sira hahú ona kolesaun amostra”, informa Odete.

Nune’e, nia kontinua apela ba Prezidente Autoridade Munisípiu, Diretór Saúde Munisípiu sira, Xefe Suku, Xefe Aldeia, no komunidade tomak katak ekipa MS hamutuk ho CIGC hala’o tiha ona teste ba dahuluk no aban sei hahú teste daruak.

Ekipa laboratóriu no vijilánsia hala’o mós kolleta sampel liuhosi prosesu triajen no halo vijilánsia sentinela ho objetivu ida katak atubele hetan karik iha ona transmisaun lokál iha komunidade nia le’et.

Odete Viegas hato’o agradese ba maluk sira ne’ebé bele kontribui ona ba teste faze dahuluk no aban sei hahú faze daruak ne’ebé mak ho totál kazu amostra ne’ebé kolleta hamutuk 186 no rezultadu balun komesa iha no balun sei hein no rezultadu sira ne’e mós negativu.

“Nafatin husu kolaborasaun no kooperasaun ba iha komunidade tomak, inan-aman sira, nia família ne’ebé maka sira-nia oan no parente tama mós iha prosesu kuarentena liubá ka sira ne’ebé mak submete ba izolamentu atu nafatin koopera, nune’e ita hotu hamutuk bele deteta no prevene kazu COVID-19 iha ita-nia rain. Nafatin mantein distánsia sosiál, distánsia fízika, fase liman bebeik, uza mákara no evita atu halibur malu iha grupu ne’ebé mak boot”, Odete salienta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here