Imajen Tatoli/Joanico de Araújo.

Ha’u tenke hahú hala’o serbisu ne’ebé antes ne’e ha’u nunka mehi no iha hanoin atu halo, satán atu halo. Bainhira hakerek notísia ida, ha’u rasik dúvida ho ha’u ninia produtu rasik, satán editór ne’ebé haree ha’u-nia produtu atu publika iha portal Tatoli. Karik, editór sira ne’ebé maka haree ha’u-nia produtu, hanesan mout iha “mehi aat” aat ida-nia laran. Tanba, sira tenke halo ezesísiu bainhira halo edisaun ba ha’u nia produtu.

DILI, 10 maiu 2020 (TATOLI)—Iha ámbitu timoroan sira luta atu prevene surtu COVID-19 hodi uza máskara no fase-liman ho sabaun, nia luta aprende prevene surtu COVID-19 liuhosi homan notísia hodi hakonu públiku nia interese kona-ba informasaun. Se jornalista balu hili dalan hala’o serbisu iha uma, nia hili dalan hala’o knaar hodi aprende no aprende “homan” no “tein” notísa iha dapur redasaun ne’ebé hatuur iha Farol, Dili.

Ba nia, mout iha “mundu jornalizmu” ne’e hanesan luku iha “mundu aprendijazen” ida be kle’an tebes. Nani bee-debu “jornalizmu” hanesan aprende nani ho ninin no rohan laek. Nia “nani” hofi aprende hosi haree, lee, rona, no aprende hosi horon. Nia haree hodi koko nia-matan nia kbiit atu kaptura buat foun ruma. Lee, nia lee atu hakle’an ninia ideia hodi halibur referénsia sai bukae atu hakat ba oin. Rona, nia rona barak hosi ema kbaas tuan (seniór) sira atu hariku nia-aan. Horon, nia horon duni “mundu jornalizmu” ho matan foun hanesan ema la’o-rai ida ne’ebé la’o lahó mapa.

Maski hahú ho matan foun no aprende buat foun, ida ne’e lahamate ninia esperansa atu aprende, aprende, no aprende. Tanba aprende neineik no beibeik, oras ne’e, hafoin tinan tolu (3) sai jornalista hodi halibur no hakerek notísia, nia bele sa’e odan (eskada) hodi sai master chief hodi “tein” notísia “Ekonomia” ho lais. Hosi reporter baibain be “delek” (buta) ba jornalizmu, maibé tanba gosta aprende no aprende, ohin loron nia sai “Editora” hodi kaer “Desk Ekonomia” iha Ajénsia TATOLI,IP.

“Hmm, knaar ne’e todan maibé ha’u koko atu aprende ho kbi’it tomak no serbisu ho responsabiliade nu’udar editora ida,” nia dehan ho hamnasa mihis.

Bainhira tuur ona iha komputadór oin, nia foku ba meta hodi la interese ba ema sira be tuur iha nia sorin-sorin. Bainhira ema seluk hasee nia, nia sempre hatudu hamnasa mihis de’it. Nia hatudu de’it oin beluk (ramah) bainhira nia belun sira sadik nia atu ko’alia. Dalaruma ida-ne’e mak ninia karáter. Ko’alia, la gosta ko’alia. Maibé, ko’alia sai dala ida, sempre kona alvu no dada ema atu hamnasa. Ha-ha-ha.

Ba sé-sé de’it, ba ema boot ka kiik, nia sempre haraik aan hodi simu ema hotu ho domin. Se ema kompara feto sira identiku ho aifunan-roza maibé ba inan-feton ida ne’e bele sai hanesan “aifunan-roza” no haraik-aan hanesan “aifunan-lodan” (teratai) ne’ebé moris iha “kolan fo’er” ida-nia laran. Nia hanesan “Lodan TATOLI” ne’ebé nafunan iha kolan laran maibé hanesan tasi-kle’an be nonook no hakmatek. Bainhira nia halo edisaun ba notísia ruma mak sala no hetan kritika ruma, nia sempre haraik-aan hodi simu no simu.

“Di’ak, ha’u hadi’a,” nia hatán ho liafuan badak de’it, “Erru tekníku ne’e normál tanba bele hadi’a fali ortografia Tetun ne’ebé hakerek sala. Maibé erru interpretasaun ne’e mak ha’u tauk. Ba oin ha’u tenke aprende serbisu ho responsabidade,” dehan jornalista dahuluk ba Ajénsia Notísioza Timor-Leste (ANTIL) hosi jornalista maluk na’in-neen seluk ne’e.

“Lodan TATOLI” ne’e moris iha Dili, iha loron 02 fulan Marsu tinan 1989. Nia hosi rai Tokodede-Liquiça, Postu Administrativu Maubara. Nia naran Julia Chatarina Lapudooh. Ba nia, moris ne’e tenke utiliza halo didi’ak tanba moris ne’e hanesan bee ne’ebé suli ba oin no nunka atu suli fila fali mai nia hun. Tanba ne’e, iha 2016 tama iha ANTIL—maski ninia antesidensia edukasaun nu’udar ema teknika ida maibé nia la baruk atu aperende no aparende.

“Sai jornalista dahuluk iha Agência Tatoli, bele dehan hanesan previléjiu ida ba ha’u. Tanba, momentu ne’ebá, iha ema barak ne’ebé iha esperiénsia ona iha área jornalizmu maka hakarak tama iha ajénsia Estadu ne’e maibé la konsege. Ha’u tama tanba oportunidade, bele hamutuk ho kolega na’in-neen maski antes ne’e laiha hanoin atu sai jornalista. Ha’u la’ós ema ne’ebé iha esperiénsia iha área jornalizmu. Tanba, ha’u lisensiadu iha área informátika, espésifiku liu iha Analiza-Dezeñu Sistema no Programasaun,” dehan Juliah ho hamnasa mihis no ho espresaun moe be moe.

Iha maiu 2016 bainhira hahú rekrutamentu ba Embriaun ANTIL, nia konkorre ba área informátika no konsege liu duni, hamutuk ho kolega na’in neen ne’ebé antes ne’e hanesan jornalista ona.

Antes hala’o kna’ar, nia ho nia maluk na’in-neen hetan oportunidade tuir formasaun iha área jornalizmu iha Indonézia no Portugal ne’ebé kuaze han tempu fulan rua. Bainhira formasaun ramata, sira hala’o knaar hanesan halo estájiu profisionál iha Embriaun ANTIL. Maski kolega na’in-neen seluk, antes ne’e, tinan barak ona mout sai jornalista maibé tuir regra no Lei Komunikasaun Sosiál, tenke halo estájiu profísionál.

“Estrañu uitoan ba ha’u maibé ida ne’e tenke liu bainhira atu sai hanesan jornalista dahuluk iha Embriaun ANTIL. Ha’u hasoru dezafiu ida bainhira fila hodi formasaun tanba ha’u tenke hamutuk ho kolega seluk hodi asegura atualiza informasaun iha portal tanba Embriaun ANTIL lansa ona. Hakarak ka lakohi, bele ka labele, gosta ka la gosta, ha’u tenke hahú hakerek. Maski dalaruma ha’u rasik dúvida ho ha’u-nia serbisu no lahatene atu hahú hosi ne’ebé. Hanesan ema ne’ebé laiha karta kondusaun maibé tanba situasaun eziji, ha’u tenke habarani-aan lori veíkulu tanba iha ema barak maka apita ona hosi kotuk,” nia dehan hodi relembra fali ninia esperiénsia dahuluk sai jornalista.

Hahú tinan dahuluk hala’o kna’ar hanesan jornalista dahuluk iha Agência Tatoli, nia hanesan turista ne’ebé tama iha fatin fuik ida. Matan tomak. Neon nakukun. Nia só presiza de’it mapa ida atu bele hakat ba oin. Se lae, nia bele lakon diresaun atu hakat uluk ba ne’ebé no mosu hikas iha fatin ne’ebé.

“Ha’u tenke hahú hala’o serbisu ne’ebé antes ne’e ha’u nunka mehi no iha hanoin atu halo, satán atu halo. Bainhira hakerek notísia ida, ha’u rasik dúvida ho ha’u ninia produtu rasik. Satán editór ne’ebé haree ha’u-nia produtu atu publika iha portal Tatoli. Karik, editór sira ne’ebé maka haree ha’u-nia produtu hanesan mout iha “mehi aat” ida-nia laran. Tanba, sira tenke halo ezesísiu bainhira halo edisaun ba ha’u nia produtu,” nia haktuir.

Maski nune’e, nia la mout no la tauk atu aprende no aprende beibeik. Moris ne’e tenke la’o ba oin. Tanba, haree ba Agência Tatoli ne’e hanesan Public Service Obligation (serbisu públiku obrigatóriu) entaun publiku ne’ebé akompana portal TATOLI lakohi hatene dehan ema sira ne’ebé serbisu iha Ajénsia Estadu ne’e hatene hakerek ka lae, maibé sira hatene tenke iha asesu ba informasaun loron ba loron.

“Ida ne’e dezafia ha’u atu hanoin. Ha’u iha hanoin ida de’it; Se ha’u nia kolega sira bele, tanba saida maka ha’u labele. Basta iha vontade atu aprende. Labele baruk no labele tauk koko buat foun. Tanba la sala atu koko buat ida, basta hatene regra, ita sei la mate. Naran katak hakat ba maka foin haree ba oin. Sira hatene hakerek tanba antes ne’e sira hakerek ona, enkuantu ha’u hakerek notísia hanesan jornada foun ida ba ha’u,” nia dehan hodi enkoraja aan ho hanoin pozitivu.

Durante nia halo knaar, nia sempre onestu ba ninia-aan rasik. Nia hatene bainhira mak nia ko’alia. Nia hatene bainhira mak nia bele rona. Nia hatene bainhira mak nia bele halo knaar ho responsabilidade. Antes nia onestu ba ema seluk, nia sempre onestu uluk ba ninia aan rasik. Nia hateten onestu de’it, iha tinan dahuluk hala’o kna’ar iha Agência Tatoli, bainhira iha diskusaun ka reuniaun ruma kona-ba área jornalismu, nia tauk no la fiar aan atu hato’o opiniaun.

“Ha’u ta´uk tanba ta´uk tama sala. Ha’u mós la fiar-aan tanba ha’u la domina área jurnalizmu nian. Satán, momentu ne’ebá estatutu Agência Tatoli sei hanesan Embriaun ANTIL, sei susar atu hato’o opiniaun ne’ebé ema bele simu, tanba ne’e deside nonok no akompaña de’it,” nia dehan.

Nia rekuñese katak durante serbisu iha Tatoli, sira ida-idak orienta sira-nia aan tanba seidauk iha ezekutivu ida maka orienta sira no seidauk iha sistema estabelesidu ne’ebé maka orienta sira-nia serbisu. Sira tama-sai serbisu fatin konforme sira hakarak maibé sira kaer metin prinsípiu ida mak “labele haluha responsabilidade”.

“Ema hateke ami lahetan! Maibé, sempre hanoin pozitivu. Katak, Ajénsia TATOLI ne’e loron ruma sei evolui no sei la mate. Uma fez ajénsia Estadu ne’e estabelesidu maka sei kontinua ba oin. Ajénsia Tatoli mate ka la eziste ona bainhira Nasaun Timor-Leste laiha ona,” nia haktuir.

Nia onestu de’it! Maibé la’os naran onestu de’it maibé liafuan suli-sai dala ida, hmmm, suli-borus kedas ema-nia aten no fuan. Balu tahan la biban, bele dezmaia iha fatin de’it. Só, nia haktuir, tama tinan daruak hala’o kna’ar iha Ajénsia Estadu ne’e, nia bele soe ona mapa ne’ebé nia kaer iha tinan dahuluk. Maski dalaruma sei bele lakon diresaun maibé bele komprende ona serbisu no komprende ona saida maka tenke halo iha momentu ne’ebá.

“Previléjiu ida sai jornalista Agência Tatoli. La barak maibé kontribui ona serbí publiku liuhosi divulga informasaun, no sai matan no tilun ba ema ne’ebé presiza espresa sira ninia sentimentu, ideia, novidade ka liuhosi opiniaun,” nia hateten.

Iha biban ne’e daudaun, nia la kolen ko’alia onestu, katak tama tinan tolu serbisu iha Agência Tatoli no ho ezisténsia Konsellu Diretivu ne’ebé kompostu hosi Prezidente no Vise na’in rua, Diretora Produsaun no Informsaun, no estrutura seluk ne’ebé estabelesidu ona hodi fahe tarefa serbisu no sitema ne’ebé hahú monta ona, eziji nia atu bele kontribui buat ne’ebé bele halo (hanesan editora).

“Agora, ha’u hakat ho firme tanba tinan tolu serbisu iha Agência Tatoli, ho dezafiu oin-oin, ho esperiénsia moruk no midar, agora bele ona orienta aan ba serbisu ne’ebé atu hala’o. Neineik maibé bebeik, bele iha ona ideia atu bele kontribui. Kuñese ona ambiente no sistema serbisu no bele integra ona iha diskusaun ruma,” nia dehan.

Ba nia, mout iha mundu jornalizmu la’os de’it haksolok tanba tara kartaun hodi hatudu lekar tun-sae hatais uniforma instituisaun mídia ida-nian hodi la’o loke hirus-matan be luan, ka tuku hirus matan katak “senior” tanba tinan barak serbisu iha instituisaun mídia ida, ka hatudu liuhosi Curriculum Vitae be nakonu to’o pájina 20 tanba tuir formasaun rebo-rebo iha rai liur, maibé importante liu mak hatudu liuhosi produtu jornalizmu be iha kualidade no ho responsabilidade.

“Ha’u sei aprende, aprende, aprende no aprende beibeik. Tanba mundu jornalizmu ne’e mundu ida ne’ebé lori jornalista sira atu aprende no aperende. Tanba, ita-nia kapasidade nia saskuat la’os sukat tinan barak ita serbisu (senior) maibé sukat hosi saida mak ita hatene, hira mak ita hatene, no hatene ne’e hatene ida oinsá nian. Ba kolega jornalista sira, mai, ita lalika kontente ho obra ne’ebé ita halo iha loron ohin maibé badinas aprende no aprende beibeik liuhosi lee no lee beibeik,” nia tatoli.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here