Imajen Espesiál.

DILI, 09 maiu 2020 (TATOLI)—Governu liuhosi MAE-MSSI foin mak konvoka reuniaun nivel munisipál atu verika dadus agregadus familiár hodi fó subsídiu $100 ba kada uma-kain, maibé sobrevivente sira iha Comite 12 de Novembro (C12N) nu’udar iha inisiativa rasik halo ona asaun solidariedade hodi fó apoiu ba família kbi’it laek sira ne’ebé kuran ba hahan.

Sekretáriu Jerál C12N, Sergio Filomeno Marques hateten, hanesan organizasaun rezisténsia ida ne’ebé akumula sobrevivente ka mate restu hosi Masakre Santa Cruz 12 Novembru 1991, iha sentimentu umanu atu fahe buat ne’ebé sira iha ba povu kbi’it laek sira ne’ebé terus ba hahan iha situasaun Estadu Emerjénsia ba COVID-19 ne’e.

“Hanesan sidaudaun timoroan no mós hanesan organizasaun rezisténsia ida ne’ebé akumula sobrevivente sira mak hanaran Comité 12 de Novembru (C12N) entaun ho ida ne’e tenta halo planu no análize ba situasaun Estadu Emerjénsia ne’ebé ita-nia Estadu fó, hodi fó apoiu ba familia kbiit laek sira ne’ebe presiza duni tulun,” dehan Sekretáriu Jerál C12N, Sergio Filomeno “Amali” Marques, ba Ajénsia TATOLI via telefonika, sabadu ne’e.

Imajen Espesiál.

Sekretáriu C12N ne’e afirma, iha implementasaun Estadu Emerjénsia ba COVID-19 ne’e komunidade ka família barak mak hetan difikuldade ba ekonómia hanesan ai-han, nune’e C12N hakarak halo kontribuisaun solidaridade ba sira ne’ebé presiza tebes.

“Loos duni. Ia-nia komunidade sira hetan difikuldade barak liuliu iha parte ekonómia nian durante fulan ida nia-laran. Entaun ho ida ne’e ami sobrevivente sira inklui kolega sira ne’ebé serbisu iha Inglatera mós fó apoiu ba C12N para depois fó kontribuisaun no solidaridade ba família sira ne’ebé kbiit la’ek,” nia dehan.

Nia hateten, sobrevivente sira konsege halibur sasán nesesidade báziku lubun ida hodi fahe ona ba família uma-kain 10 iha Kapitál Dili maibé foin mak fahe ba uma-kain sia (9).

“Ami tenke halibur sasán sira mai hosi sobrevivente rasik no ami identifika ema ne’ebé presiza tebes tulun tan ne’e. C12N ajuda ona ba família uma-kain 10. Kada uma-kain ita fó mak supermie dos ida (1), fós saku ida ho kg 20 no mina litru rua (2),” Sekretáriu Jerál C12N ne’e hateten.

Imajen Espesiál.

Nia hatutan, benefisiáriu kbi’it laek sira ne’ebé mak C12N identifika mak xefe família tolu (3) iha Suku Kampung Alor, Suku Becora nian mak xefe família haat (4), Suku Camea na’in-ida (1) no Suku Bemori na’in ida (1).

Iha biban ne’e, nia informa, Comite 12 de Novembro kontinua halo identifikasaun ba ema sira ne’ebé laiha kbiit iha Dili ka munisípiu atu fó ajuda tanba C12N sei iha sasán ne’ebé atu fahe tan.

“Ami mós iha planu atu fó apoiu ba komunidade sira iha munisípiu tanba horisehik ami simu kontaktu hosi sobrevivente ba C12N nian katak iha família (Maubisse) balun ne’ebé presiza hahan. Tanba ne’e, aban ami sei dezloka ba Munisípiu atu nune’e bele fó apoiu ba sira,” dehan Sergio Filomeno “Amali” Marques.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here