Portavóz Gabinete Sentru Integradu Jestaun Krize (CIGC), Sergio Lobo. Imajen/Egas Cristovao

DILI, 09 maiu 2020 (TATOLI)—Koordenadór Forsa-Tarefa Prevensaun no Metigasaun Surtu COVID-19 no Portavóz Sala Situasaun Sentru Integradu Jestaun Krize (CIGC, sigla portugés), Sérgio Lobo hateten, semana oin, Ministériu Saúde (MS) sei klarifika valor subsídiu ba Pesoál Saúde Munisípiu Dili.

“Kona-ba profisionál saúde sira ne’ebé mak halo protesta ne’e, ha’u hanoin ema hotu iha direitu atu hato’o sira-nia deskontentamentu ba buat ruma. Bainhira sira la kontente ho buat ruma ne’ebé mak sira sente katak ladún konkorda. Tanba ne’e, tuir buat ne’ebé ha’u haree hosi televizaun horisehik, ekipa Ministériu Saúde Munisípiu Dili nian, hakarak atu husu klarifikasaun. Tanba ne’e, iha semana oin, entre segunda ka tersa feira, Ministériu Saúde sei halo klarifikasaun ba sira. Sei esplika didi’ak ba sira tanbasá mak iha klasifikasaun ne’ebé la hanesan hosi subsídiu ne’ebé maka profísional saúde sira iha direitu bá,” dehan Sérgio Lobo ba jornalista sira liuhosi konferénsia imprensa iha Sentru Mídia CIGC iha Sentru Konvensaun Dili (CCD, sigla portugés), Merkadu Lama, Dili, sábadu ne’e.

Entretantu iha sesta (08/05/2020), ekipa Pesoál Saúde Munisípiu Dili konsentra iha Sentru Saúde Formoza, liuhosi konferénsia imprensa Portavóz Eugenia Pinto husu klarifikasaun tanba sente deskriminadu no violadu ba sira-nia direitu perante surtu COVID-19.

“Ami pesoál saúde sente deskriminadu no violadu tanba la konsidera hanesan funsionáriu esensiál ne’ebé fahe ona tuir pílares servisu nian. Ami haree katak ami-nia ministériu rasik mak viola ami-nia direitu iha estadu emerjénsia. Nune’e, ami hakarak aproveita biban ida ne’e hodi husu ba Ministériu Saúde atu bele halo esplikasaun kona-ba desizaun ba proposta ne’ebé konsidera hosi MS atu halo pagamentu ba pesoál liña frente sira, ne’ebé aprezenta no aprova ona iha konsellu ministru,” Eugénia husu.

Pesoál Saúde Munisipiu Dili daudaun ne’e hamutuk na’in 600  ne’ebé maihosi Sentru Saúde Komoro, Sentru Saúde Bekora, Sentru Saúde Vera Cruz, Sentru Saúde Formoza, Sentru Saúde Metinaru no Sentru saúde Ataúro.

Antes ne’e, Vise-Ministru Estratéjiku Dezenvolvimentu Saúde, Bonifácio Maukoli dos Reis hateten, Governu aprova suplementu remuneratóriu ho valór $25 ba ekipa liña frente razoavel tanba konsidera Timor-Leste seidauk tama iha situasaun grave.

Proposta ne’ebé ministru sira diskute no aprova ho kategoria mak hanesan kategoria dahuluk ho valór $25 ba sira ne’ebé iha fatin izolamentu no laboratóriu, ba sira ne’ebé servisu iha kuarentena $20 no ba sira ne’ebé servisu iha parte administrasaun tanba laiha kontaktu direta ho pasiente sira simu $15.

Notísia Relevante: Governu Konsidera $ 25 ba Ekipa Liña Oin Ne’e Razuavel

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here