Portavóz Gabinete Sentru Integradu Jestaun Krize (CIGC), Sergio Lobo. Imajen/Egas Cristovao

DILI, 09 maiu 2020 (TATOLI)—Dadus ofisiál hosi Sala Situasaun Sentru Integradu Jestaun Krize (SS-CIGC) relata, ohin, kazu negativu surtu COVID-19 hosi rezultadu teste laboratóriu sa’e ba ema na’in 750 kompara ho loron horisehik iha na’in 692.

Koordenadór Forsa-Tarefa Prevensaun no Metigasaun Surtu COVID-19 no Portavós SS-CIGC, Sergio Lobo informa, númeru kumulativu teste ba COVID-19 iha na’in 852, na’in 750 negativu, konfirmadu na’in 24, rekuperadu na’in 21 no sei hela iha izolamentu iha na’in-hitu (7), kazu foun zero, provável zero no hein rezultadu iha na’in 80 (horisehik na’in 114).

“Ema sei iha konfinamentu obrigatóriu ka kuarentena ema na’in 173 (horisehik na’in 135), kompostu hosi iha fasilidade Governu nian iha Dili na’in 107 no iha fasilidade Governu nian iha munisípiu na’in-34. Tantu, iha auto-kuarentena iha ema na’in 34, kompostu hosi iha Dili zero no iha munisípiu na’in-34,” dehan Sergio Lobo ba jornalista sira liuhosi konferénsia imprensa iha Sentru Mídia CIGC iha Sentru Konvensaun Dili (CCD, sigla portugés), Merkadu Lama, Dili, sábadu ne’e.

Nia relata, profísionál saúde iha kuarentena na’in 45 (horisehik na’in 44) no dadus kumulativu ema ne’ebé liu ona loron-14 iha konfinamentu obrigatóriu ka kuarentena hamutuk ema na’in 2.083 mak hanesan iha Dili na’in 1.645 ho iha munisípiu na’in 438 (horisehik na’in 2.080; 1.642 iha Dili no munisípiu na’in 438).

Apelu

Tanba ne’e, liuhusi konferénsia imprensa ne’e, lori SS-CIGC nia-naran, Sergio Lobo kontinua fo apelu ba populasaun tomak atu kontinua kumpre regra distansiamentu fíziku mínimu metru ida, tuur hakmatek iha uma, no evita halibur malu, keta rona boatu no notísia sira hosi fonte ne’ebé la loos.

“Rona no fiar de’it informasaun sira ne’ebé sai hosi konferénsia imprensa ne’ebé SS-CIGC realiza loron-loron,” afirma Sergio Lobo.

SS-CIGC husu atu populasaun kontinua prátika ijiéne pesoál liuliu fase-liman beibeik ho sabaun no liman labele kona-ba inus, matan ho ibun, uza máskara bainhira sai hosi uma.

“Ita-nia esforsu atu mantein distansiamentu fíziku no observa ijiéne pesoál inklui fase-liman beibeik mak sei bele hadook ita huoi infesaun COVID-19,” Sergio Lobo hateten.

Jornalista : Cipriano Colo

Editór      : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here