Imajen Tatoli/Osória Marques.

DILI, 09 maiu 2020 (TATOLI)–Juventude Artemarsial Persaudaraan Setia Hati Terate (PSHT), ohin, entrega apoiu solidariedade ba igreja Katólika liuhosi Parókia Balide tanba sira konsidera igreja Katólika mak bele halo jestaun di’ak nune’e kontribuisaun sira ne’e tenke liuhosi igreja mak fahe ba kbi’it la’ek sira.

Reprezentante Juventude PSHT Mascarenhas, Teodósio Alves hateten, juventude PSHT Mascarenhas halo asaun karidade ne’e hodi entrega sasán ba igreja hodi bele fó apoiu solidariedade ba komunidade kbi’it laek sira.

“Ami joventude PSHT Mascarenhas halo asaun karidade ida liuhosi igreja katólika-Parókia Balide. Ami fó apoiu solidaridade ba komunidade sira ne’ebé kbiit la’ek maibé apoiu ida-ne’e entrega ba igreja mak fahe tanba ami konsidera katak igreja mak bele halo jestaun di’ak entaun ohin ami entrega sasán,” dehan Reprezentante juventude PSHT Mascarenhas, Teodósio Alves, ba jornalista sira iha igreja Parokia Balide, Dili, sábadu ne’e.

Apoiu solidariedade ne’ebe juventudea PSHT entrega ba igreja  mak hanesan fós saku 30, Mina dos rua (2), supermie dos ualu (8), masin dos rua (2) no masin-midar. Ba oin, sira  kontinua serbisu hamutuk ho igreja atu fó apoiu solidaridade ba sarani kbi’it laek sira.

Sasán hirak ne’e, nia informa, inisiativa hosi juventude sira-nian ne’ebé hakarak atu ajuda ba família kbi’it la’ek sira durante iha Estadu Emerjénsia ba Covid-19 nian.

“Ami-nia inisiativa rasik hodi soe dolar ida, nune’e sosa sasán hodi ajuda ba komunidade sira ne’ebé presiza duni atu tulun. Tanba bainhira ita hanoin dolar ida ($1) hodi sosa de’it ba sigaru, di’akliu tau dolar ida hamutuk hodi ajuda ba kbi’it la’ek sira. Ida ne’e mak ami hala’o iha ami-nia bairru laran,” nia dehan.

Entretantu, Vise Prezidente Konsellu Pastorál Parókia Balide, Eduardo da Silva hateten, igreja Parokia Balide agradese ba apoiu hosi juventude PSHT Mascarenhas tanba liuhosi apoiu ne’e bele fó tulun fali ba ema ne’ebé presiza duni atu tulun.

“Hodi amu Pároku nia naran ami agradese ba apoiu hosi joventude PSHT Mascarenhas ne’ebé mak fó ona apoiu ba Parókia Balide nian no Parókia sei fahe ba povu ne’ebé vulneravél liu ba hahan no ba sira ne’ebé mak presiza hahan liuliu iha tempu agora daudaun nee,” nia dehan.

Eduardo da Silva informa, durante ne’e sira fahe ona kontribuisaun hahan ba xefe família 100-resin. Tuir panu, nia dehan, sei fahe tan bainhira ajente Parókia Balide identifika ema ne’ebé presiza hahan.

“To’o agora ami fahe ona atus 100-resin. Ba sira ne’ebé presiza liu mak fo apoiu maibé dadus tama nafatin tanba ami-nia ajente sira mós buka informasaun iha bairru no fatin-fatin sira izoladu ami nafatin apoiu,” nia reforsa.

Nia hateten, apoiu hosi Parókia la haree ba relijiaun maibé ba sarani hotu ne’ebé mak presiza sei fó apoiu hotu.

Jornalista : Osória Marques

Editór      : Cancio Ximenes

1 KOMENTÁRIU

  1. Parabens ba Maun alin Sira. Atu sujere deit katak se bele ajudus nee halo kontinua label hare ba situasaun covid 19 deit, Tamba Ita maluk Sira balun iha area Rural neba nee barak Mak sei kbit laek.balun Han loron Ida Dala Ida deit.

HAKEREK NO HATÁN

Please enter your comment!
Please enter your name here