Estudante timor-oan iha Jogjakarta, Indonézia, Claudino Osvaldo Fátima da Silva. Imajen/FB Dino Silva

DILI, 09 maiu 2020 (TATOLI) Estudante timor-oan iha Jogjakarta, Indonézia, Claudino Osvaldo Fátima da Silva, reprezenta ninia maluk estudante sira, hateten katak sira prontu koopera ho Governu Timor-Leste durante implementasaun Estadu Emerjénsia (EE), ne’ebé seidauk deside atu loke fronteira terrestre.

“Ami Estudante hirak ne’ebé sei iha nasaun viziñu Indonézia prontu koopera ho Governu katak ami sei la fila ba rai Doben Timor-Leste bainhira Governu seidauk deside atu loke Fronteira, tamba ami hatene úniku dalan atu prevene pandemi COVID-19 maka tenke taka fronteira hotu atu labele iha movimentu husi nasaun seluk ba rai Timor Leste, nune’e bele salva povu Timor-Leste tomak husi vírus ne’ebé oras ne’e nasaun barak afetadu no númeru mortál sa’e maka’as”, tenik estudante ne’e ba Agência Tatoli via telefónika, sábadu ne’e.

Notísia Relevante: Governu Halo Regulamentu Subsídiu Estudante Timor-oan Naun Bolseiru Iha Estranjeiru

Maski nune’e, nia husu Governu atu aselera pagamentu subsídiu ne’ebé Governu promete ona.

“Ami estudante ne’ebé oras ne’e sei iha nasaun viziñu Indonézia husu ba Governu Timor-Leste atu aselera lalais subsídiu ne’ebé Governu promete mai ami estudante iha rai-li’ur tamba inskrisaun ne’ebé Governu liuhosi Embaixadór no Adidu Edukasaun Timor-Leste iha Indonézia fó mai liuhosi online ami priense no ami hatama liu fulan ida ona maibé subsídiu seidauk to’o mai ami estudante sira ho razaun dadus estudante sira-nia sei iha prosesu verifikasaun nia laran”, nia subliña.

Embaixadór no Adidu Edukasaun Timor-Leste iha Indonézia husu estudante sira atu hein tanba dadus hotu manda ona ba Governu Sentrál, maibé laiha informasaun klaru.

“Ami atu hein to’o bainhira mak subsídiu ne’e bele to’o mai ami, atu ami bele uza hodi fasilita ami-nia moris durante iha Estadu Emerjénsia ida-ne’e”, nia akresenta.

Iha biban hanesan, nia parte mós husu ba Ministériu Negósiu Estranjeiru no Kooperasaun atu komunika ho nasaun viziñu Repúblika Indonézia atu fó toleránsia na estudante estranjeiru sira kona-ba Kartu Ijin Tinggal Terbatas (KITAS) ne’ebé mate durante iha Estadu Emerjénsia nia-laran.

Tuir estudante timor-oan ne’e, bainhira povo atu kumpre desizaun Estado ka atu kumpre regra husi Estadu, maka Estadu rasik presiza kria kondisaun di’ak ba povu.

“Timor-Leste sei la sai nasaun afetadu ba COVID-19 bainhira povu tomak servisu hamutuk atu prevene no kumpre regra ne’ebé fó sai husi Estadu liuhosi Ministériu Saúde no doutor sira. Tanba ne’e agradese no fó fiar nafatin ba ita-nia Estadu no Doutor sira tamba sira-nia servisu maka’as maka Timor Leste to’o oras ne’e seidauk iha kazu mortál ba pandemia COVID-19”, nia subliña.

Prezidente Repúblika, Francisco Guterres ‘Lú Olo’ dekreta estensaun Estadu Emerjénsia iha loron 28 abríl hahú tuku 00:00 to’o loron 27 maiu 2020 iha tuku 23:59.

Konsellu Ministru Finaliza Ona Mekanizmu Atribuisaun Subsídiu

Iha loron 29 abríl, Governu liuhosi Konsellu Ministru finaliza ona mekanizmu sira ligadu ho atribuisaun subsídiu ba estudante timor-oan naun bolseiru sira iha rai-li’ur.

Mekanizmu ba atribuisaun subsídiu ne’e Governu estabelese liuhosi kriasaun Dekretu-Lei ida ne’ebé mak hetan ona aprovasaun iha Konsellu Ministru.

Kona-ba determinasaun valór ba kada estudante mós finaliza ona no hein Dekretu-Lei hetan promulgasaun maka Konsellu Jestaun realiza fali reuniaun hodi halo aprovasaun hodi hahú atribui ona subsídiu ba estudante sira iha rai-li’ur.

Valór ba estudante iha kada nasaun sei la hanesan tanba depende ba kustu vida nasaun ne’ebé sira hela ba.

Orsamentu subsídiu ba estudante naun bolseiru iha estranjeiru, Governu prevee ona millaun $2, relasiona ho implementasaun Estadu Emerjénsia no pandemia COVID-19.

Nune’e iha fulan-maiu nia-laran sei hahú pagamentu ba estudante sira no sei tuir faze.

Faze dahuluk kompleta ona purvolta estudante timor-oan naun bolseiru iha estranjeiru hamutuk na’in-2.014 mak sei hetan uluk pagamentu no pagamentu faze daruak sei tuirmai hafoin faze dahuluk nian ramata.

Nune’e, Governu kontinua hein estudante sira ne’ebé seidauk kompleta dokumentu hodi bele hetan pagamentu iha ba faze daruak.

Prosesu pagamentu subsídiu ba estudante sira sei liuhosi konta bankária estudante ida-idak nian.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here