Ilustrasaun

Liquiçá, 08 maiu 2020 (TATOLI)Diretora Saúde Munisípiu Liquiçá, Apolónia dos Santos, husu ba komunidade atu hamoos ambiente uma, nune’e bele halo prevensaun ba moras dengue tanba Sentru Saúde Liquiçá rejista ona pasiente moras dengue hamutuk na’in-44 no ida mate.

Tuir Dirijente ne’e, moras dengue hanesan moras ida ne’ebé perigu tebes, tanba ne’e atu halo prevensaun tenke hamoos ambiente uma hanesan hasai bee nalihun iha lata, roda no sasán seluk nia laran tanba susuk gosta liu moris iha bee nalihun nia-laran.

Kuandu bee nalihun maka provoka susuk no ikus mai bele tata ema no bele hamosu moras dengue.

“Kuandu ita kuda ai-funan no rega bee nalihun iha laran tenke fakar sai tiha bee tanba susuk buka de’it bee nalihun mak tolun, hafoin mai fali tata ita no ita-nia ambiente kuandu moos susuk ne’e la besik. Tanba ne’e maka atu halo prevensaun ba dengue tenke hamoos ambiente, tanba agora moras dengue rejista ona na’in-44 no ida mate, hela na’in-43. Númeru ne’e boot tanba ne’e ha’u husu atu halo prevensaun maka’as”, hateten Diretora Saúde Munisípiu Liquiça, iha ámbitu entrega materiál saúde ijiene hodi prevene surtu COVID-19 inklui mós materiál promosaun saúde moras dengue ne’ebé realiza iha sede Suku Lauhata, Munisípiu Liquiçá, sesta ne’e.

Diretora ne’e adianta, bainhira família ida-nia ambiente moos maibé viziñu nian foer, nafatin sei labele halo prevensaun tanba susuk bele semo fali ba ida moos.

“Tanba ne’e tenke hakoi kalen aat sira, roda iha uma karik tenke taka metin nune’e labele haki’ak susuk tolun tanba bainhira susuk tolun mak nakfera tan entaun susuk barak no bele tata no hamosu moras dengue”, nia akresenta.

Nune’e mós, Sekretáriu Munisípiu Liquiçá, Renato Nunes Serão, realsa tenke halo prevensaun maka’as ba moras dengue tanba moras ne’e hamate ona ema iha Timor-Leste, enkuantu Coronavírus seidauk.

“Ambiente kuandu foer bele lori ita ba moras ida ne’e. Tanba ne’e maka ho apoia sira hosi parseiru sira-nia ajuda tebes ita hodi halo prevensaun di’ak liután”, nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here