Xefe Bankada Partidu Demokrátiku (PD), António da Conceição ‘Kalohan'. Imajen TATOLI/António Gonçalves

DILI, 08 maiu 2020 (TATOLI)—Xefe Bankada Partidu Demokrátiku (PD) António da Conceição defende kompozisaun meza Parlamentu Nasionál (PN) atuál ne’ebé okupa hosi CNRT, PLP, KHUNTO no UDT/FM tanba Parlamentu Nasionál mak hahoris VIII Governu Konstitusionál.

“Destituisaun meza atu halo nusá ne’e señor prezidente parlamentu nasionál mak sei pronunsia. Maibé, ha’u mai fó hanoin mós ba prezidente katak meza ida-ne’e mak hahoris VIII Governu. Se nafatin VIII Governu signifika legalidade ba meza ninian ne’e tenke ser iha lai. Ha’u mai fó hanoin ida-ne’e. Se la konsidera mós, prezidente parlamentu mak sei bele deside,”  Deputadu António da Conceição, informa ba jornalista sira hafoin halo análize hamutuk ba pedidu destituisaun ho Prezidente Parlamentu Nasionál, Arão Noé de Jesus da Costa Amaral, sesta ne’e.

Nia hatutan, kompozisaun meza atuál, Prezidente Parlamentu Nasionál Arão Noé de Jesus da Costa Amaral hosi CNRT, Vise-Prezidente Parlamentu Nasionál Maria Angelina Sarmento Lopez hosi PLP, Segundu Vise PN Luis Roberto hosi KHUNTO, Sekretária Meza PN Maria Terezinha Viegas hosi CNRT, Vise-Sekretária PN Isabel Maria Barreto Freitas Ximenes hosi Bankada UDT/FM no Segundu Vise-Sekretária Regina Freitas hosi PLP.

“Agora daudaun hanoin atu sobu (kompozisaun meza) signifika tenke ser iha ona orientasaun ida atu iha Governu foun karik maibé tenke iha pronunsiamentu hosi Prezidente Repúblika, atu ami mós hatene katak planu ba IX Governu. Ida-ne’e, fó dalan fasilmente ko’alia kona-ba la’ós desituisaun ona maibé pasajen hosi VIII Governu ba IX Governu,” nia dehan.

Xefe Bankada PD ne’e la dehan, laiha dalan atu destitui meza parlamentu maibé ko’alia iha kurridór kompozisaun meza atuál nian.

Notísia Relevante: Arão Noé: “Uluk Pedidu Destituisaun To’o Fulan-Neen, Agora Mós Hanesan”

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here