Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 08 maiu 2020 (TATOLI) – Ministru Obra Públika, Salvador Eugênio Soares dos Reis Pires, Konsidera desizaun Konsellu Ministru ba suplementu remuneratóriu ho valór $5 kada loron ba tékniku Eletiricidade de Timor Leste (EDTL) no Diresaun Jerál Água no Saneamentu (DGAS, sigla portugés) ne’e razoável tanba Timor-Leste rasik seidauk tama iha situasaun ida grave liga ho surtu COVID-19.

“Kona-ba remuneratóriu ne’ebé aprezenta no Konsellu Jestaun fundu COVID-19 aprova ba kada loron tékniku sira hetan $5, sosializa ona  ba ami-nia funsionáriu tékniku sira ne’ebé ba ami ne’e razoável no laiha problema ida”, tenik Ministru Salvador iha edifísiu EDTL, Caicoli, sesta ne’e.

Tékniku EDTL na’in-340 no DGAS na’in-140 mak sei asesu ba suplementu remuneratóriu ne’e durante períodu Estadu Emerjénsia.

MOP rasik aprezenta ona proposta ba Sentru Integradu Jestaun Krize (CIGC, sigla portugés) atu asesu fundu COVID-19 hodi fó subsídiu ba tékniku EDTL no DGAS.

Governante ne’e konsidera, tékniku sira ne’e iha nível ne’ebé barak liu ho saláriu kada fulan $115, maibé sira mós aposta ba risku COVID-19 tanba kuandu eletrisidade, agua no saneamentu hetan avaria ruma sira tenke halo atendimentu.

Konsellu Ministru aprova suplementu remuneratóriu ba profisionál ne’ebé durante ne’e dedika sira-nia an hodi halo pervensaun ba surtu COVID-19.

Montante $25 ba kategoria dahuluk ba sira ne’ebé servisu iha fatin izolamentu no laboratóriu, $20 ba sira ne’ebé servisu iha kuarentena no mós $15 ba sira ne’ebé servisu administrative ka sira ne’ebé apoia maibé laiha kontaktu direta.

Enkuantu ba motorista, forsa defeza no seguransa, imigrasaun, kuarentena, alfándega no sira ne’ebé servisu iha fronteira, aeroportu, no portu kada loron hetan $15 no ba pesoál tékniku eletrisidade, água no sanemanetu, limpeza, seguransa sivíl no pesoál sira rekolla lixu kada loron $5.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here