Primeiru-Ministru, Taur Matan Ruak, prezide reuniaun Komisaun Interministeriál ba koordenasaun ba medida prevensaun no kontrolu ba COVID-19 iha Salaun Ministériu Finansas, Aitarak-Laran, sexta (08/05). Imajen Tatoli/Egas Cristovão

DILI, 08 maiu 2020 (TATOLI) – Primeiru-Ministru (PM), Taur Matan Ruak prezide reuniaun Komisaun Interministeriál hodi halo koordenasaun ba medida prevensaun no kontrolu hodi halo distribuisaun tarefa atu luta kontra surtu COVID-19.

Ministru Koordenadór Asuntu Ekonómiku interinu, Fidelis Manuel Leite Magalhães, hateten reuniaun Komisaun Interministeriál ne’e haree liu ba distribuisaun tarefa no kontinuasaun desizaun ne’ebé  Konsellu Ministru foti ona hodi hato’o filafali ba Komisaun Interministeriál sira hodi hamutuk luta kontra pandemia globál.

“Ita asina buat ruma karik, to’o faze asina kontratu presiza hakat liuhosi  aprovasaun órgaun sira hanesan Konsellu Ministru, Komisaun Interministériál no Konsellu Jestaun Fundu  COVID-19 tanba ne’e ita tenke hato’o filafali desizaun sira iha Konsellu Ministru ba Komisaun Interminiteriál ba luta kontra COVID-19,” tenik Ministru Fidelis iha edifísiu Ministériu Finansa, Aitarak-Laran, sesta ne’e.

Governante ne’e adianta, iha aspetu distribuisaun tarefa ne’e atu diminui duplikasaun programa iha atribuisaun Fundu COVID-19 nian ne’ebá jere husi Komisaun Jestaun Fundu COVID-19.

“Ami fahe informasaun ba malu, kona-ba medida ka buat hirak ne’ebé  ita prepara tiha ona atu labele kria duplikasaun tanba liña ministeriál sira mós aprezenta iha ambitu sósiu-ekonómiku  no Sentru Intergadu Jestaun Krize (CIGC, sigla portugés), no mós aprezenta iha ámbitu operasionál nian, ne’ebé ita tenke haree katak aspetu rua ne’e labele kahur malu atubele fasilita liután prosesu halo desizaun”, nia akresenta.

Enkontru Komisaun Interministeriál ne’e atu informa desizaun ne’ebé Konsellu Ministru halo ona, liuliu aprovasaun ba alterasaun dahuluk Dekretu-Lei númeru 12/2020 14 abríl, ne’ebé regula Fundu COVID-19.

Konsellu Ministu aprova proposta Dekretu-Lei ne’ebé hatuur ba moratóriu kréditu sira ne’ebé sidadaun sira halo iha banku finaseiru sira.

Dekretu-Lei ida-ne’e atu fó resposta ba konstranjimentu no difikuldade hirak ne’ebé mosu tanba reseita no rendimentu tuun, ne’ebé iha relasaun ho ekonomia ne’ebé la’o neineik hela tanba efeitu surtu COVID-19 no ba risku husi espirál inkumprimentu nian ida, ne’ebé kria efeitu negativu ba sistema finanseiru no konsekuénsia ba ekonomia reál.

Diploma ne’ebé aprovadu estabelese moratória ida iha kumprimentu husi obrigasaun kapitál no jurus emerjente kontratu husi kréditu sira, adia ninia vensimentu iha fulan tolu.

Iha mós redusaun ida ba porsentu 40 iha períodu fulan-tolu sub-sekuente bainhira diploma ne’e tama iha vigór no obrigasaun pagamentu jurus ho ninia kargu sei responsabiliza husi devedór, no ninia restante porsentu 60 sei finansiadu husi Estadu.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here