Primeiru-Ministru, Taur Matan Ruak, prezide reuniaun Konsellu Ministru estraordinária iha Salaun Ministériu Finansa, Aitarak-Laran, sexta (08/05). Imajen Tatoli/Egas Cristovão

DILI, 08 maiu 2020 (TATOLI) – Governu liuhosi reuniaun Konsellu Ministu aprova proposta Dekretu-lei ne’ebé hatuur moratóriu kréditu ne’ebé sidadaun sira halo iha banku finaseiru sira.

Ministru Koordenadór Asuntu Ekonómiku interinu, Fidelis Manuel Leite Magalhães, informa  diploma ne’ebé aprovadu husi ezekutivu, estabelese moratória ida ba kumprimentu obrigasaun kapitál no jurus kontratu emerjente husi kréditu sira ne’ebé adia ninia vensimentu iha fulan-tolu.

Iha mós redusaun ba porsentu 40 iha períodu fulan-tolu sub-sekuente bainhira diploma ne’e tama iha vigór no obrigasaun pagamentu jurus, ne’ebé ninia kargu sei responsabiliza husi devedór no ninia restante porsentu 60 sei finansiadu husi Estadu.

“Ba kréditu sira iha banku, Governu sei servisu hamutuk ho Banku Sentrál atu fó kobertura ba ema ne’ebé halo kréditu iha banku atu halo pagamentu ba kréditu durante fulan-tolu liuliu durante iha períodu Estadu Emerjénsia ne’ebé Estadu mak halo kobertura porsentu 60 no porsentu 40 ne’e Banku Komersiál sira mak sei haree atu halo kmaan ba sidadaun sira ne’ebé halo kréditu,” tenik Ministru Fidelis hafoin reuniaun Konsellu Ministru estraordinária iha edifísiu Ministériu Finansa, Aitarak-Laran, sesta ne’e.

Tuir governante ne’e, Governu hatuur polítika ne’e tanba  Estadu hatene maioria husi sidadaun sira ne’ebé halo kréditu ka foti osan iha banku finanseiru sira hodi konsumu no halo investimentu ne’ebé ajuda tebes sira atu  moris hanesan halo uma no negósiu ki’ik.

Ho nune’e, nia adianta aprovasaun Dekretu-Lei ne’e atu apoia moratóriu ne’ebé kooperasaun Banku Sentrál no Banku Komersiál liuhusi Governu loke dalan legál hodi atribui rekursu públiku atu implementa medida ba realidade impaktu pozitivu ba sidadaun sira.

Pakote setór ekonómiku iha mós komponente kréditu ne’ebé prevee osan millaun $19,6, maibé iha implementasaun tenke verifika ida pur ida, nune’e bele iha posbilidade atu redús fali estimativu ka tetu ba kustu ne’ebé Governu hatuur.

“Ba medida kréditu ne’e rasik ita halo estimasaun purvolta millaun $3,5 hodi bele implementa fó moratóriu ka fó kmaan ba ita-nia sidadaun sira ne’ebé halo kréditu iha Banku Komersiál no insitituisaun finaseiru”, katak Ministru Fidelis.

Implementasaun Hafoin Dekretu Hetan Promulgasaun

Kona-ba implemetasaun, tuir Ministru Dekretu-Lei ne’e foin aprova husi Konsellu Ministru no sei hato’o ba Prezidente Repúblika hodi halo promulgasaun hafoin Governu no Banku Sentrál Timor-Leste tama iha faze implementasaun.

“Ami fiar katak ita-nia Banku Komersiál sira apár ona tanba durante ne’e servisu hamutuk liuhosi supervizaun ho Banku Sentrál Timor-Leste (BCTL, sigla portugés) atu prepara meiu hodi fasilita medida ne’ebé Dekretu-Lei ne’e hatuur ona”, nia akresenta.

Maski, iha país ne’e moris ho dezafiu barak iha insititusionál, maibé ho esforsu husi Governu no BCTL nian sei verfika dadus sira ba benefisiáriu kréditu sira atu hala’o intervesaun lais hodi fó impkatu pozitivu ba sidadadun sira.

Dekretu-lei ida-ne’e atu fó resposta ba konstranjimentu no difikuldade hirak ne’ebé mosu tanba reseita no rendimentu tuun no iha relasaun ho ekonomia ne’ebé la’o neneik hela tanba efeitu husi surtu COVID-19 no ba risku espirál inkumprimentu nian ne’ebé kria efeitu negativu ba sistema finanseiru no konsekuénsia ba ekonomia reál.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here