Hosi: Memensio Sequeira Freitas*)

Polítika atuál Timor-Leste nian manas ba beibeik iha semana sira ikus ne’e. Lideransa partidu sira susar tebes ona atu hetan konsensu nasionál ida, hodi bele solusiona impase polítika iha rai doben ida ne’e. Barak liuhosi lideransa sira ne’ebé “selok ka xoke” malu daudaun ne’e mak hirak ne’ebé uluk “luta hamutuk” ka “terus hamutuk” iha ai-laran no sira ne’ebé mós luta iha tasi balun no sidade laran ba kestaun independensia nasionál nian.

Sai ona segredu públiku katak Xanana Gusmão ho ninia ideolojia polítika, joga hela ninia polítika hasoru Lú-Olo (hanesan mós lideransa FRETILIN) no Taur Matan Ruak nu’udar Primeiru-Ministru no prezidente Partidu Libertasaun Populár nian. Ema hotu hatene, katak sira na’in tolu uluk “luta hamutuk” iha ai-laran no “terus hamutuk” iha udan no anin nia laran. Biar horisehik “luta hamutuk”, ohin mosu ona “konflitu Polítika” entre ema na’in tolu ne’ebé ema barak respeita tebe-tebes.

Iha siénsia polítika, konflitu polítika sempre liga ho violénsia hanesan barullu ka estrundu, kudeta, terorizmu no revolusaun. Konflitu bele define nu’udar “xoke” iha aspeitu diferensa ideia, kompetisaun no kontensaun entre individu ida no individu seluk, grupu ida ho grupu seluk, entre individu ida ho grupu ida ou entre individu ka grupu ida hasoru governu.

Amplamente, konflitu polítiku bele define nu’udar diferensa ideia, kompetisaun polítika no kontra malu entre individu ka grupu ruma ka organizasaun polítiku (partidu polítiku) sira iha esforsu luta ba poder ka atu bele hetan kbiit hodi governa. Dalan atu governa, bele liuhosi instituisaun sira hanesan lejislativa, judisiáriu, ezekutivu ka prezidensiál, ne’ebé iha Timor-Leste no iha rai barak koñese ho Órgaun Soberania Nasaun nian.

Realidade hatudu katak entre Xanana Gusmão, Taur Matan Ruak, Lú-Olo no sira seluk mai hosi istória ne’ebé hanesan. “Luta hamutuk” iha ai-laran nu’udar liman kro’at povu nian atu liberta rai no povu Timor-Leste tuir mehi saudozu sira ne’ebé oferese ona sira-nia vida ba rai ida ne’e. Hafoin liberta tiha rai doben ida ne’e, sira kontinua sira-nia mehi atu kore povu hosi mukit. Para alkansa objetivu ida ne’e, sira fahe malu iha vida polítika hodi ida-idak eskolla dalan polítika ne’ebé sira tenke liu. Lú-Olo hili hamutuk ho partidu FRETILIN, Xanana harii CNRT no Taur Matan Ruak rasik harii PLP. Iha partidu keta-ketak nia laran mak sira hala’o sira-nia polítika oinsá bele liberta povu hosi mukit.

Polítika la’ós objetu maibé nu’udar matadalan ida atu atinje bem star sosiál. Maibé, tanba orientasaun ne’ebé sala, ikus mai polítika nia objetivu ikus mak poder. Jurista Avelino Coelho afirma fila-fila katak situasaun ida agora daudaun ne’e, “luta pelo poder”! Tanba poder mak sai ona nu’udar finalidade ba polítika, entaun valor hosi amigu ka “kompañeru luta nian” mós ita bele troka ho konflitu.

Ida ne’e bele konsidera nu’udar konseitu polítika ne’ebé kloot ka mukit tebtebes. Ita nia laran nakali oituan, bainhira mídia sosiál sai fatin ba eventu “hurlele malu” entre ita-nia lideransa sira. Aat liu tan, grupu balu foti sa’e lideransa balu no hatuun rabat rai lideransa seluk, enkuantu sira mesak maun ho alin iha tempu funu nian. Kultura “vingansa polítika” atu soran lideransa sira sai manas liu tan tanba interese partikulár hodi aproveita situasaun manas ida ne’e. Ne’e, la’ós dalan no maneira di’ak atu harii futuru ida brillante ba Timor-Leste!

Ita nia laran taridu liu mós, bainhira maun boot sira be uluk “luta hamutuk” dezakredita malu liu hosi liafuan oin-oin hodi kestiona nia maluk ida nia kapasidade, inteletuál no polítika. Loos duni! Iha polítika laiha maun-alin, iha mak adversáriu. Maibé seráke relasaun “terus nian” ne’ebé sira liu hamutuk lakon tiha ona hosi sira neon? Ka tanba sira haluha tiha ona katak sira ne’e hotu uluk “luta hamutuk” ho prinsipiu ida de’it? Ka tanba sira nia kakutak venena tiha ona ho intensaun aat hosi ema balu ne’ebé hakarak sobu sira nia relasaun? Maun Taur rasik deklara fila-fila katak “la iha ema ida mak koñese maun Xanana di’ak liu fali ha’u”! Maibé, tanbasá mak nune’e fali?

Durante tinan hirak ne’e nia laran, ita haree dalabarak mak maun boot na’in tolu ne’e hurlele malu ho polítika “kelas elit nian”. Xanana dala barak ona dezakredita Lú-Olo ho liafuan oin-oin hanesan “beikteen”, “sarjana supermie”, “nia la hatene buat ida”, no liafuan selseluk tan iha públika. Taur Matan Ruak, mós halo atake verbál hasoru Xanana, bainhira ko’alia iha Parlamentu Nasionál nu’udar Prezidente Repúblika tinan hirak liu ba. Taur hanaran Xanana nu’udar Soeharto Timór nian. Taur konsidera katak Xanana ho Alkatiri mak hetan liu previléjiu Estadu nian hodi riku matak iha Timór, enkuantu povu terus rabat rai. Xanana dala barak mós nega katak “Ha’u la’ós Taur nia maun, nia ne’e panglima, ha’u rakyat biasa” no selseluk tan. Soe lia ba malu hirak ne’e, halo ita-nia isin-fulun hamriik.

Relasaun entre Xanana Gusmão ho Taur Matan Ruak sai la dun di’ak durante kampaña eleitorál iha 2017. Dalabarak, prezidente PLP ne’e halo atake hasoru maun boot ho akuzasaun oin-oin. “Dalan ba Baguia hanesan maun Xanana nia oin. Ha’u lakohi hamutuk ho sira tanba sira fo’er ona” no selu-seluk tan halo tensaun polítika entre líder na’in rua ne’e aumenta aas. Maibé la hatene tanba sá, derepente de’it maun boot hadi’a lalais de’it nia relasaun ho nia alin Taur, liu hosi felisitasaun aniversáriu nian ba nia alin Taur. Lalais de’it sira na’in rua “mesra” tiha fila fali no “asmara polítika” ne’e mosu fila fali entre ema na’in rua ne’e. Hamutuk iha kampaña ba Eleisaun Antisipada, maun alin na’in rua halo atake ba FRETILIN ho nia lideransa sira hanesan Alkatiri no Lú-Olo.

Durante VIII Governu Konstitusionál ne’e la’o, Xanana ho Taur Matan Ruak hasoru Lú-Olo hanesan morru boot ida be dudu la ba no tebe la borus. Lú-Olo uza ninia kompeténsia nu’udar Prezidente Repúblika, halo maun alin na’in rua buka dalan hotu la hetan, tanba desizaun hotu-hotu tenke desidi finál iha Palasiu Prezidensiál “Bairru Pité”. Hahú kedas hosi pondera lista membru Governu indijitadu balun, veta OJE 2019, veta Lei estruturante balu to’o lakohi fó pose ba membru Governu sira, halo relasaun entre Xanana Gusmão ho Taur Matan Ruak naksobu hikas. La pasiénsia ona ho situasaun ida ne’e, maun boot Xanana nia partidu (CNRT) halo xumba tiha proposta OGE 2020. Taur tenke monu hosi kadeira ain tolu PM nian, maibé TMR la monu rabat rai, tanba Lú-Olo salva hela nia maun alin funu nian ne’e hodi fó nafatin konfiansa atu kontinua governasaun ida ne’e to’o mandatu ramata.

Ho salva malu hirak ne’e, Lú-Olo nia kredibilidade polítika sai kestionável, la’ós de’it iha Xanana nia matan maibé ema sira ne’ebé hale’u Xanana haree Lú-Olo hanesan fatór impedementu boot ida. Fatuk mutin Ossú nian kala to’os duni, hodi halo intensaun polítika balu tenke mout iha mehi laran. Biar hetan atake verbál oin-oin, Lú-Olo kontinua ezerse nia funsaun Estadu ho kalma no iha silénsiu nia laran. Akuzasaun lubuk ida hasoru Lú-Olo la’o namanas, até maun boot rasik deklara halo petisaun hasoru Prezidente Repúblika. Maun boot nia deputadu sira asina tiha ona petisaun, no liu hosi advogadu ne’ebé indika hosi maun boot ho CNRT, petisaun refere iha ona Tribunal Rekursu nia liman. Ita hein, saida mak sei akontese ba Lú-Olo nia kareira polítika?!

Haree hosi konflitu polítika entre ita-nia maun boot sira, ita bele kestiona, “Legadu di’ak saida mai ita-nia aman sira atu husik hela mai jerasaun foun sira”? Será ke kontinuasaun hosi Nasaun ida-ne’e nia vida tenke hela nafatin de’it ho vingansa polítika? Ha’u hanoin labele! Jerasaun foun sira tenke aprende oinsá kurrije situasaun ida-ne’e hodi lori Timor-Leste ba oin ho di’ak! Ita-nia maun boot sira mós, mezmu sira xoke malu hela, maibé sira sempre dehan “Timór tenke bá oin!” Loos duni, ita hotu aseita katak Timór tenke bá oin ho polítika ida di’ak.

Deputadu Asanami sempre bolu antensaun ba maun boot sira atu tuur hamutuk, halo diálogu hodi buka solusaun di’ak ba rai no povu ida ne’e. Prezidente Lú-Olo mós sempre bolu atensaun ba diálogu, maibé la hetan entedementu di’ak hosi grupu balun, nune’e vontade ba diálogu mós namlaek ba beibeik. Maibé, loos duni, nahe biti boot mak sempre sai kultura di’ak hodi rezolve problema uma laran. Laiha dalan ne’ebé di’ak liu fali hosi diálogu. Jerasaun foun sira ne’ebé hola parte iha ukun ida ne’e, tenke reforsa prezidente Partidu Demokrátiku nia hanoin atu husu ba maun boot sira tuur hamutuk. La’ós aproveita fila fali situasaun ida-ne’e hodi kontinua soran liderasan sira.

Ita sente estrañu, ita-nia lideransa sira funu nian, sira mak divia tuur hamutuk hodi rezolve no solusiona kualkér konflitu polítiku ne’ebé akontese daudaun iha ita-rain, maibé depois sira mak envolve rasik iha konflitu laran. Reprezentante povu nian no líder polítiku sira nu’udar mós ukun na’in ida, presiza sai ezemplu, pelu menus atu povu bele unidu no moris iha dame nia laran.

Maibé, afinál lae! Lideransa sira mak kria fali forsa polítiku ne’ebé diferente, entre sira mak kompete malu no hamosu konflitu polítiku atu luta ba poder ba sira-nia aan no grupu rasik. Ida ne’e, karik sei la eduka povu ho di’ak. Maibé dala ida tan, ho povu nia hakmatek durante situasaun polítika ne’e la’o, pelu menus fó netik roman foun ida ba lideransa sira, katak konflitu la’os dalan di’ak atu dezenvolve Timor-Leste ba oin.

*) Hakerek na’in nu’udar profesór ida iha Eskola Sekundária Públika Olocassa Ossú (Viqueque) no hela iha Ossú.

HAKEREK NO HATÁN

Please enter your comment!
Please enter your name here