Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristóvão

DILI, 08 maiu 2020 (TATOLI) – Ministru Negósiu Estranjeiru no Kooperasaun, Dionísio da Costa Babo Soares, informa Konsellu Ministru aprova ona dektretu-lei ida hodi fó kompeténsia ba Diretór Jerál no Sekretáriu Jerál iha ministériu sira atubele asina dokumentu importante sira iha kestaun emerjénsia balun.

“Ita espesifikamente ba Fundu COVID-19 ne’e Konsellu Ministru aprova katak atu fó kompeténsia ba Diretór Jerál sira mós bele halo asinatura ba montante balun ne’ebé naturalmente iha rejime jerál aprovizionamentu nian responsabilidade ministériu ba membru governu maka asina”, dehan Ministru Dionísio iha edifísiu Ministériu Finansa, Aitarak-Laran, sesta ne’e.

Nia adianta, ba kazu COVID-19 ne’e rasik tamba situasaun emerjénsia maka bele fó mós fatin balun ba Diretór Jerál ka Sekretáriu Jerál atubele deside.

Konsellu Ministru aprova Projeitu Dekretu-Lei ne’ebé Primeiru-Ministru, Taur Matan Ruak, aprezenta kona-ba alterasaun dahuluk ba Dekretu-Lei númeru 12/2020, loron 14 abríl, ne’ebe regulamenta Fundu COVID-19 nian.

Ho objetivu atu hatán ba difikuldade sira ne’ebé mak mosu no asegura ho lalais iha tramitasaun prosesu aprovizionamentu nian no iha selebrasaun kontratu públiku sira ne’ebé mak atu hatán ba situasaun urjente sira no diploma ne’e atribui ba Konsellu Ministrus atu fó kompeténsia liuhosi Dekretu Governu nian no tranzitoriamente fó dalan.

“Iha kazu hirak ne’ebé iha justifikasaun forte no tranzitoriamente, órgaun sira husi departamentu governamentál balu ka pesoa koletiva públika ruma bele prátika aktu ne’ebé ninia kompeténsia iha prinsípiu, tuir loloos inklui iha kuadru atribuisaun departamentu governamentál seluk ka pesoa koletiva públika seluk nian”, refere nota imprensa husi ezekutivu.

Ho aprovasaun Dekretu-Lei ne’e, atribui ba Diretór Jerál sira ne’ebé mak sai nu’udar responsável ba servisu finanseiru husi departamentu governamentál oin-oin no kompeténsia atu autoriza realizasaun prosedimentu aprovizionamentu nian ne’ebé destinadu ba adjudikasaun kontratu públiku sira, ne’ebé ninia despeza sei finansia husi Fundu COVID-19 nian, no ida ne’e sei la aas liu millaun $1 no mós atu asina kontratu sira ne’ebé adjudikadu hafoin realizasaun prosedimentu aprovizionamentu nian hirak ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here