Portavóz CIGC, Odete Viegas. Imajen/Egas Cristovão

DILI, 08 maiu 2020 (TATOLI)-Portavóz Sentru Integradu Jestaun Krize (CIGC-sigla portugés), Odete Viegas da Silva apresia ho kontribuisaun hosi abitante na’in lima iha Munisípiu Ermera tanba voluntariamente entrega an ba profisionál saúde hodi halo teste ba prevensaun COVID-19.

“Husi sira na’in lima ne’e, na’in haat antes ne’e kuarentena iha Dili no na’in 1 iha auto-kuarentena iha Ermera, maibé sira nafatin koopera ho ekipa vizilánsia epidemiolójika hodi halo teste nafatin ba sira nia an,”informa Atuál Diretóra Jerál Prestasaun Saúde ne’e durante konferénsia imprensa iha CCD, sesta (08/05/2020).

Abitante ida ne’ebé auto-kuarentena iha ninia uma ne’e, Portavóz CIGC ne’e esplika antes ne’e nia halo kontaktu ho ninia maun hafoin fila hosi Indonézia iha fulan-marsu 2020 liubá.

“Nia koopera ho profisionál saúde sira liliu sira husi survilensia inklui sira husi laboratóriu hodi halo ezamina no teste ba nia an,” tenik Odete.

Tanba ne’e CIGC apresia ho kontribuisaun populasaun sira iha Ermera tanba ho konsensia hakarak kolabora ho profisionál saúde sira hodi prevene transmisaun surtu coronavirus iha Timor-Leste.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here