Imajen/Osória Marques.

DILI, 07 maiu 2020 (TATOLI)–Movimentu Brigada Xanana (MBG) estabele Sentru Apoiu Umanitária hodi fó apoiu umanitária ba família uma-kain 61 iha Aldeia 12 de Outubru, Suku Comoro, Postu Administrativu Dom Aleixo, Munisípiu Dili.

Reprezentante Responsável Movimentu Brigada Xanana, Rojeiro da Cruz hateten, impaktu hosi Estadu Emerjénsia ba surtu COVID-19 halo komunidade iha Aldeia 12 de Outubru barak mak susar ba nesesidade báziku, entaun sira hola inisiativa hodi estabelese Sentru Apoiu Umanitária Brigada Xanana hodi fó apoiu ba komunidade sira.

Imajen/Osória Marques.

“Estabelesimentu Sentru BRIGADA XANANA nian para halibur rekursu no ho sentimentu umanidade hodi ajuda inan-aman ne’ebé afetadu ba nesesidade báziku liliu iha fulan rua nia laran. Realidade, ohin, ita-nia inan-aman sira hato’o ona sira-nia preokupasaun katak durante fulan rua nia laran sira labele hala’o atividade hodi sustenta nesesidade báziku hanesan ai-han tanba hanesan direitu fundamentais ida. Ami ho inisiativa rekolla uma-kain iha Aldeia 12 de Outubru hamutuk 61 maibé ba uma-kain ne’ebé grave liu,” dehan Rojeiro da Cruz ba jornalista sira iha Aldeia 12 de Outubru, Suku Comoro, Postu Administrativu Dom Aleixo, Munisípiu Dili, kinta ne’e.

Nia dehan, Movimentu Brigada Xanana hamutuk ho komunidade sira hodi kombina no fahe ai-han hanesan fós, mina, manu-tolun no supermie ba komunidade sira ne’ebé laiha duni kbi’it.

Reprezentante responsável ne’e informa, Movimentu Brigada Xanana estabelese la’ós ba aldeia ka suku ida maibé movimentu ida ne’e nia ezistensia atu ajuda ema hotu-hotu ne’ebé presiza no ba oin sei alarga ba komunidade sira ne’ebé presiza duni nesesidade báziku.

Iha fatin hanesan, benefisiáriu Marcelino Tavares hateten ho moras Coronavirus (COVID-19), sira iha de’it uma laran durante fulan rua nia laran no lahalo atividade entaun susar atu hetan osan hodi sosa hahan atu han.

Benefisiariu, Rojeiro da Cruz. Imajen/Osória Marques.

“Durante fulan rua nia laran ami iha de’it uma laran. Ami la sai no la halo atividade ruma entaun ami laiha buat ida. Ami hamlaha. Hatene, ba ami buat ida laiha maibé hodi ita-nia maun-alin sira hosi Movimentu Brigada Xanana nia apoiu mak hetan ai-han báziku hodi augenta ba ami-nia moris,” dehan benefisiáriu ne’e.

Tanba ne’e, nia hato’o agradese ba apoiu tomak hosi Movimentu Brigada Xanana ba ai-han ne’ebé sira oferese ba komunidade sira liuliu sira ne’ebé menus kapasidade ba hahan.

“Ami agradese ba apoiu no suporta tomak ba ai-han ne’ebé oferese hosi ita-nia maun-alin Movimentu Brigada Xanana nian,” dehan Marcelino.

Entretantu, benefisiáriu Aurelia Pereira hateten komunidade besik fulan tolu nia laran terús no susar tanba laiha hahan ba auguenta moris loro-loron nian.

“Ha’u kontente tebes ho apoiu ne’ebé Movimentu Brigada Xanana tanba besik fulan tolu ona, ami terús no susar tanba sulan an iha uma laran. Sorte ami-nia viziñu sira tulun fó ami hahan mak ami bele dada-iis ne’e. Ajuda hahan ne’e sufisiente ona ba ha’u ho ha’u-nia be-oan atu auguenta moris,” nia haktuir.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here