Maneira atu asesu ba subsídiu pre-pagu eletrisidade. Imajen/EDTL

DILI, 07 maiu 2020 (TATOLI) – Tuir ajenda iha sesta (08/05), Ministériu Obra Públiku (MOP) sei asina tan akordu ho operadór telekomunikasaun tolu hanesan Timor-Telecom, Telemor no Telkomcel atu fó subsídiu pre-pagu eletrisidade faze daruak iha períodu estensaun Estadu Emerjénsia ba kliente Eletrisidade de Timor-Leste (EDTL).

Valór subsídiu pre-pagu eletrisidade sei hanesan faze dahuluk, ne’ebé $15 ba kliente hamutuk 166.555 ba fulan-maiu.

Tuir ajenda ne’ebé Agência Tatoli asesu asina akordu sei hala’o iha edifísiu MOP, Caicoli, aban, oras 16:00 lorokraik.

Antes ne’e, Ministru Obra Públika, Salvador Eugênio Soares dos Reis Pires informa iha faze dahuluk kliente ne’ebé asesu subsídiu liuhosi operadór telekomunikasaun Timor Telecom, Telemor no Telkomcel hamutuk 111.558, husi kliente 160.555, ho nune’e kliente ne’ebé seidauk asesu hamutuk 48.997 iha fulan-abríl nia laran.

Governante ne’e adianta, subsídiu ne’e hanesan naun finanseiru tanba ne’e operadór telekomunikasaun manda de’it númeru token pre-pagu nian ho falin $15 ba kada númeru kontadór kliente.

Subsídiu pulsa eletrisidade no bee-moos ho objetivu atu evita movimentasaun komunidade nian ba hola pulsa eletrisidade no selu bee-moos iha balkaun, hodi mantein distánsia sosiál no kontaktu fíziku, nune’e prevene propagasaun COVID-19 iha Timor-Leste.

Meiu atu asesu subsídiu pre-pagu eletrisidade mak hanesan hakerek EDTL #númeru kontadór manda ba númeru hotline 12150.

Jornalista: Florencio Miranda Ximenes
Editora: Julia Chatarina

HAKEREK NO HATÁN

Please enter your comment!
Please enter your name here