Ministru Defeza no Ministru Interiór interinu, Filomeno da Paixão de Jesus. Imajen/António Gonçalves

DILI, 07 maiu 2020 (TATOLI)  Governu liuhosi reuniaun Konsellu Ministru Estraordinaria kuarta (06/05) aprova rezolusaun kona-ba suplementu remuneratóriu ba profesionál saúde sira, Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), ajente administrasaun sira, no seluk tan ne’ebé dedika-an ba servisu durante prevensaun surtu COVID-19 iha Timor-Leste.

Relasiona ho montante $15 ba PNTL no F-FDTL kada loron hahú husi fulan-marsu, Ministru Defeza no no Seguransa no Ministru Interiór interinu, Filomeno da Paixão de Jesus konsidera katak valór kada loron ne’e razoável tanba membru PNTL no F-FDTL sira ne’e laiha kontaktu direta ho pasiente COVID-19 ka servisu direta ba fatin izolamentu Vera Crúz.

“Montante $15 ne’ebé atribui ba membru PNTL no F-FDTL ne’e razoável tanba ita laiha espozisaun boot liu ba iha oin, espozisaun maka’as liu maka Doutor no Infermeiru sira ne’ebé mak besik liu ema sira moras iha fatin izolamentu no kuarentena. F-FDTL apoia husi dook de’it la’ós ba besik hodi kontatu direta ho sira”, hateten Filomeno iha Kuartel Jenerál, Fatuhada, kinta ne’e.

Governante ne’e hatutan, membru F-FDTL no PNTL hotu sei simu osan $15 kada loron tanba dezde Estadu Timor-Leste aplika Estadu Emerjénsia ligadu ho surtu COVID-19, forsa rua ne’e nafatin hala’o kna’ar hanesan baibain.

“Ein prisípiu sira simu hotu kedas tanba iha parte sivíl ita-nia despeza ba funsionáriu maioria hela iha uma. Ezemplu iha Ministériu Defeza porsentu 10 de’it mak iha servisu fatin hodi halo servisu maibé forsa hotu servisu”, nia argumenta.

Montante ne’ebé prevee iha Rezolusaun Governu ba Ministériu Saúde (MS) fahe ba kategoria tolu, kompostu husi kategoria dahuluk $25 ba sira ne’ebé servisu iha fatin izolamentu no laboratóriu, kategoria daruak $20 ba sira ne’ebé servisu iha kuarentena no mós kategoria datoluk $15 ba sira ne’ebé serbisu administrasaun ka sira ne’ebé apoiu maibé laiha kontaktu direta.

Ba motorista, forsa, polisía, imigrasaun, kuarentena, alfándega, no sira ne’ebé servisu iha Fronteira, Aeroportu, Portu no Terrestre kada loron $15, enkuantu ba pesoál agua no saneamentu, eletrisidade, limpeza, seguransa sivíl, no pesoál sira rekolla lixu kada loron $5.

Jornalista: Antónia Gusmão

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here