Prezidente PD, Mariano Assanami Sabino. Imajen/Egas Cristovão

DILI, 07 maiu 2020 (TATOLI)—Deputadu Bankada Parlamentár Partidu Demokrátiku (PD), Mariano “Assanami” Sabino, husu ho haraik-aan ba Governu atu hadi’a remunerasaun ne’ebé Governu aprova tanba la justu.

“Hanesan Deputadu haree katak remunerasaun ne’ebé Governu apoia hodi subsídia ekipa frontline sira la justu. Ha’u husu ho haraik-aan atu hadi’a tanba profisionál sira-ne’e serbisu iha situasaun defísil nia laran,” dehan Mariano “Assanami” Sabino liuhosi Konferénsia Imprensa iha sede PD, Colmera, Dili, kinta ne’e.

Deputadu PD, Mariano “Assanami” Sabino, louva ekipa liña frente hanesan médiku, forsa no seguransa, jornalista, cleaner sira-ne’ebé besik fulan rua ona halo serbisu maka’as hodi kombate no halo prevensaun hasoru surtu COVID-19.

Nia dehan, PD iha prinsípiu liuhosi Parlamentu Nasionál hato’o tiha ona katak presiza osan natoon hodi halo serbisu durante Estadu Emerjénsia ne’e.

Iha momentu ne’e, PD propoin dolar $60 ba PNTL, F-FDTL, Guarda Prijionál, Bombeiru sira no sira seluk iha liña oin no ba médiku sira PD propoin rihun $2,500 kada fulan no mídia [jornalista] sira-ne’ebé iha frente (oin) tanba hotu-hotu hola parte atu kombate surtu COVID-19 ne’e.

Tuir nia, iha situasaun ida-ne’e ema barak ta’uk no halai buka fatin seguru, tanba ne’e governu tenke apresia ho remunerasaun ne’ebé justu.

“La’ós ho osan nia númeru maibé estadu tenke konsidera sira,”  hateten Deputadu Mariano “Assanami” Sabino.

Notísia Relevante: PD Deklara Prontu Apoia Governu Atu Hakotu Inserteza Polítika

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here