Administradór Postu Administrativu Dom Aleixo, Tomas Barros. Imajén/Osória Marques

DILI, 07 maiu 2020 (TATOLI)–Administradór Postu Administrativu Dom Aleixo, Tomas Barros informa, ohin, entrega ona dadus uma-kain atu simu subsídiu hamutuk xefe família 31.289 Autoridade Munisípiu Dili (AMD) hodi submete ba Ministériu Administrasaun Estatál (MAE).

Nia hatutan, dadus uma-kain 31.289 ne’e kompostu hosi uma-kain permanente 28.205 no komunidade sira ne’ebé hela temporária iha Pstu Administrativu Dom Aleixo hamutuk uma-kain 2.712.

“Ohin, ha’u lori ona ita-nia dadus subsídiu ba Prezidente Autoridade Munisípiu Dili tanba tempu limite entaun ita hapara ona ita-nia atualizasaun dadus ba subsídiu para ita konsentra lai ba dadus ne’ebé ita rekolla ona,” dehan Administradór Postu Administrativu Dom Aleixo, Tomas Barros, ba Ajénsia TATOLI iha nia knaar fatin, Fatuhada, Dili, kinta ne’e.

Nia informa, serbisu atualizasaun dadus subsídiu durante loron sanulu (10) nia-laran hahú hosi loron 27 abril 2020–06 maiu 2020 konsege finaliza ona dadus subsidiu iha loron kuarta-feira (06 maiu 2020).

“Ita-nia atualizasaun dadus subsídiu ne’e kobre hosi Aldeia 71 no Suku hitu (7). Serbisu ne’e finaliza horisehik no ohin submete ona ba AMD tanba hetan apoiu no suporta hosi Xefe Aldeia, Xefe Suku, delegada/u suku nian inklui Konsellu Polisiamentu Komunitáriu,” nia relata.

Iha situasaun Estadu Emerjénsia ne’e halo separasaun sosiál hodi labele halo involvimentu komunidade ne’ebé barak nune’e labele lori moras COVID-19 ne’e, tanba parte hotu-hotu nia esforsu.

“Programa rekolla dadus mós halo parte ba situasaun Estadu Emerjénsia ba COVID-19 nian, nune’e ita koopera ho parte hotu-hotu hodi esforsu tomak nune’e horisehik finaliza dadus no ohin relata ona ba AMD,” nia dehan.

Notísia Relevante: Administradór Postu Administrativu Dom Aleixo Sei Submete Dadus Populasaun ba AMD

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here