Reitór Universidade Nasionál Timor Lorosa’e (UNTL), Francisco Miguel Martins. Imajen/TATOLI

DILI,06 maiu 2020 (TATOLI)-Reitór Universidade Nasionál Timor Lorosa’e (UNTL), Francisco Miguel Martins informa nia parte la aplika subsídiu ba funsionáriu administrasaun universidade nian ne’ebé maka servisu durante implementasaun estadu emerjénsia.

Nia esplika maski prosesu aprendijazen paradu maibé servisu administrasaun kontinua la’o normal hanesan baibain durante implementasaun EE hahú iha fulan-marsu to’o ohin loron.

“Ita-nia funsionáriu administrasaun sira ne’e simu sira-nia saláriu normal tuir level no grau no tuir tabelamentu husi governu kedan,” katak Reitór UNTL ne’e ba TATOLI iha ninia servisu fatin, kuarta ohin.

Funsionáriu Públiku iha diretu ba saláriu fulan-fulan husi Governu tanba ne’e UNTL laiha razaun atu oferese subsídiu ba sira.

“Ita kontinua mantein desijaun governu nian atu labele ko’a de’it kualker funsionáriu ida nia osan iha situasaun estadu emerjensia ne’e, mezmu sira ne’ebé mak halimar de’it iha uma maibé iha nafatin diretu atu simu sira nia saláriu tuir nivel ka grau ne’ebé iha,” nia reforsa liután.

Tuir nia funsionáriu UNTL ne’ebé maka tama servisu durante EE ne’e hodi atende de’it servisu urjente ruma.

“Sira administrasaun nian ita fasilita hotu despaixu, kartaun asesu atu sira bele lori inklui karreta ne’ebé sira utilija hetan hotu estiker atu nune’e bele tulun sira hodi halo servisu perante funsionamentu estadu emerjénsia nia laran,” dehan Francisco.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here