Adjuntu Autoridade Munisípiu Dili, José Filipe Ximenes Smith.

DILI, 06 abril 2020 (TATOLI)–Adjuntu Autoridade Munisípiu Dili, José Filipe Ximenes “Zeca” Smith, ohin, atualiza dadus uma-kain Munisípiu Dili atu simu subsídiu ho dadus provizóriu hamutuk 25.814 la inklui ho Postu Administrativu Dom Aleixo ho Na’in Feto tanba Postu Administrativu rua ne’e sei iha hela atualizasaun dadus.

Nia hateten, daudaun ne’e Postu Administrativu haat iha Munisípiu Dili submete ona dadus uma-kain sira ne’ebé atu simu subsídiu hosi Governu ba Autoridade Munisípiu Dili (AMD).

“Ita foin mak simu atualizasaun dadus subsídiu nian hamutuk Postu Administrativu haat (4) hanesan Postu Administrativu Cristo Rei hamutuk 11. 963, Metinaro iha 1.651 uma-kain, Ataúro 2.684 uma-kain no Vera Crus hamutuk 9.516. Maibé Postu Administrasaun neen (6) kuaze tama hotu ona,” dehan Adjuntu Autoridade Munisípiu Dili, José Filipe Ximenes “Zeca” Smith, ba Ajénsia TATOLI iha nia knaar fatin, Matadoro, Dili, kuarta ne’e.

Nia hatutan, Munisípiu Dili iha Postu Administrativu neen (6) no Suku 36, iha ne’ebé populasaun barak liu tanba ne’e autoridade komunitáriu sira seidauk bele kobre hotu maibé Autoridade Munisípiu Dili (AMD) termina tempu ba Administradór sira mak horisehik (tersa, 05 maiu 2020) ne’e.

“Ita-nia tempu limitadu tebes. Tanba ne’e, susar atu atualiza dadus hotu, nune’e ita hein de’it. Karik, Postu Administrativu balun ne’ebé finaliza ona, bele entrega agora no lorokraik ita sei submete ona ba Ministériu Administrasaun Estatal (MAE) hodi prosesa ba oin. Tanba, tempu ne’ebé ita fó ba Administradór sira mak horisehik hodi atualiza dadus ba AMD,” nia dehan.

Nia informa, loron ohin (kuarta, 06 maiu 2020) Postu Administrativu Dom Aleixo no Na’in Feto seidauk entrega maibé Autoridade Munisípiu Dili (AMD) labele hein sira.

“Ita labele hein tan tanba presiza prosesu lubuk ida hanesan halo kopia ba dokumentu hirak ne’e hodi sai arkivu ba AMD nian. Tanba ne’e, lorokraik submete ona dadus ba Ministériu Administrasaun Estatal atu verifika,” nia dehan.

Bainhira, nia hateten, Postu Administrativu rua ne’e mak entrega ona mak AMD sei prosesa dokumentu ka dadus hodi submete ba MAE maibé agora Postu Administrativu ne’ebé mak hatama ona ne’e tenke submete ona ba MAE.

Kona-ba lista adisionál ne’ebé Postu Administrativu sira submete ba Autoridade Munisípiu Dili (AMD), nia hatán, lista adisionál sira ne’e sei konsidera hotu bainhira Xefe Suku no Administradór Postu Administrativu sira hamosu lista refere.

“Ita konsidera lista adisionál bainhira ita-nia Xefe Suku no Administradór Postu Administrativu sira hamosu lista adisionál dezde ema ne’e nia lista ka dokumentu komprovativa ka hetan karimbu hosi autoridade sira,” dehan Zeca Smith.

Nia esplika, tuir Governu sentrál nia polítika no Autoridade Munisípiu Dili (AMD) tuir de’it saida mak Governu anúnsia katak subsídiu ne’e vale ba fulan tolu hahú hosi fulan marsu to’o maiu.

“Ita serbisu administrasaun halo tuir Governu sentrál nia polítika de’it. Konforme ami rona katak fulan tolu hahú hosi fulan marsu to’o fulan maiu,” nia dehan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here