Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristovão

DILI, 06 maiu 2020 (TATOLI) Konsellu Jestaun Fundu COVID-19 realiza reuniaun ba dahaat hodi halo aprezentasaun no aprovasaun ba proposta hosi ministériu sira, inklui filtra proposta balun hosi ministériu sira ne’ebé laiha relasaun direta ho COVID-19.

Ministru Negósiu Estranjeiru no Kooperasaun, Dionísio da Costa Babo Soares, informa proposta sira ne’ebé ministériu sira aprezenta tenke bazeia ba lei númeru 12/2020 ne’ebé aprova iha Parlamentu Nasionál, tanba kuandu la bazeia ba lei ne’e maka Konsellu Jestaun sei filtra.

Planu ezekusaun ne’ebé halo aprezentasaun no aprovasaun maihusi ministériu no instituisaun sira hanesan Gabinete Primeiru-Ministru (GPM) inklui Sentru Integradu Jestaun Krize (CIGC, sigla portugés), Ministériu Transporte Komunikasaun (MTK), Ministeriu Turizmu, Komérsiu no Industria (MTKI), Ministériu Defeza no Seguransa (MDS), Ministériu Interior (MI), Sentru Lojístika Nasionál (CLN, sigla portugés), no Ministériu Saúde (MS).

“Apresiasaun sira ne’e haree tuir kabementu orsamentu ne’ebé mak iha. Konsellu Jestaun Fundu halo diskusaun hamutuk ho kargu xefia sira inklui hosi instituisaun FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) hodi filtra proposta ne’ebé sira hatama, tanba tenke halo proposta bazeia ba lei númeru 12/2020 ne’ebé hasai hosi Parlamentu Nasionál ho regra implementadór hosi Fundu COVID-19 rasik”, relata Ministru Dionísio hafoin reuniaun iha Salaun Ministériu Finansa, Aitarak-Laran, kuarta ne’e.

Governante ne’e esplika, lei hateten katak kualkér proposta ne’ebé halo tenke iha relasaun direta ho COVID-19, ne’ebé bainhira ministériu sira ne’e aprova hotu rekezitu maka Konsellu Jestaun sei konvola hikas reuniaun hodi aprova no halo pagamentu.

Nia adianta, ministériu sira ne’ebé ninia proposta hetan aprovasaun mai ho ninia atividade lahanesan, ezemplu mak hanesan CIGC ne’ebé tutela ba GPM, ninia servisu espesífiku maka ba kontrolu no mós análiza no prodús desizaun polítika kona-ba COVID-19.

MDS ninia atividade iha ligasaun ho pesoál sira ne’ebé servisu iha liña frente, oinsá bele prapara ekipamentu protesaun, nune’e mós ministériu sira seluk hanesan MTKI ninia atividade haree ba kuarentena, hahán ba sidadaun sira iha kuarentena, kontratu ba otél sira ne’ebé uza ba fatin kuarentena.

CLN ninia atividade mak sosa foos hodi prepara ba stock iha fulan-tolu tuir mai.

“Maibé iha proposta sira ne’e ami haree tuir fali pontu sira ne’ebé mak tuir ami-nia hanoin tenke filtra hodi kumpre loloos lei ne’ebé mak iha”, nia akresenta.

Ministru ne’e salienta, ministériu balun dalaruma hakarak tau osan atu sosa ekipamentu saúde hanesan máskra, luvas no seluk tan, maibé sasán sira ne’e iha hotu ona MS ne’ebé la presiza tau tan osan hodi sosa rasik ida-idak ninian maibé bele halo akizaun ba MS.

“Kona-ba kestaun sira seluk ne’ebé bele selu ho despeza rutina ministériu ida-idak ninia labele halai hotu ba Fundu COVID-19, hanesan materiál eskritóriu no kombustível tanba ne’e la’ós relasaun ho COVID-19, ne’e tama iha kategoria bens no servisu kada ministériu nian ne’ebé bele utiliza fundu duodésimu ka bele haree hosi fundu finansiamentu seluk ne’ebé tenki deskute hamutuk ho Ministériu Finansa hodi hetan aprovasaun”, nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here