Imajen/Osória Marques.

DILI, 06 maiu 2020 (TATOLI)–Relasiona ho implementasaun Estadu Emerjénsia períodu daruak ba surtu COVID-19 nian, juventude Aldeia Virgolosa, Suku Vila Verde, Postu Administrativu Vera Cruz, Munisípiu Dili, iha inisiativa rasik hodi fó kontribuisaun alimentasun ba benefisiariu sira ne’ebé menus ba kapasidade.

“Ita joventude hosi Aldeia Virgolosa ho inisiativa no hakarak ai-han ba ita-nia benefisiariu sira tanba sira menus kapasidade. La’ós katak benefisiariu sira ne’e kbiit la’ek ka mukit maibé sira-nia kapasidade mak menus tanba ne’e ita fó apoiu malu liuhosi ai-han hodi bele hakat liu situasaun ne’ebé mundu tomak enfrenta no agora daudaun ita enfrenta moras COVID-19,” dehan Responsável Komisaun Organizadora Posko Asaun Solidaridade COVID-19 Aldeia Virgolosa, Arlindo Alves Mendonca, ba jornalista sira iha Aldeia Virgoloza, Suku Vila Verde, Dili, kuarta ne’e.

Responsável ne’e informa, ai-han sira ne’e mai hosi doadór sira Aldeia Virgolosa nian inklui Profesór Portugal sira ne’ebé hela iha Aldeia Virgoloza nian.

“A-ihan ne’ebé ita oferese ka ajuda ba benefisiáriu sira hamutuk 58 mak hanesan Fós 15-30 kg hamutuk saka 1933, mina 2-5 litru hamutuk 209, no supermie 58 dos,” nia informa.

Nia haktuir, ai-han sira ne’e fahe tuir ba benefisiáriu ka família uma-laran nia kuantidade ema. Karik família ida ema barak entaun simu tuir barak maibé bainhira família ida mak ema ladún barak mós simu tuir totál ema.

Iha fatin hanesan, Xefe Aldeia Virgolosa, Feliciana Iria Soares hateten, atividade asaun solidaridade ida ne’e realiza tanba joventude Aldeia Virgolosa nia hanoin no planu no bolu hodi fó kontribuisaun ba ita-nia maluk ne’ebé menus kapasidade.

“Ita-nia joventude sira iha Aldeia Virgolosa mak iha inisiativa rasik, tuur hamutuk halo planu no fó hanoin ba malu hodi realiza asaun solidaridade ba família ne’ebé menus kapasidade ne’e,” dehan Xefe Aldeia ne’e.

Imajen/Osória Marques.

Entretantu, benefisiáriu Julio Ferereira hato’o agradese ba inisiativa husi joventude Aldeia Virgolosa nian tanba bele apoiu ona sira hodi la haree ba atu barak ka uitoan maibé sira simu de’it.

“Apoiu ai-han ne’ebé joventude hamutuk ho profesór Portugal sira oferese ne’e, ita simu de’it atu barak ka uitoan simu de’it. Tanba apoiu ida ne’e la’ós Governu ka partidu polítiku sira nian maibé vontade hosi joventude Aldeia ida ne’e nian nune’e ita agradese simu de’it,” dehan benefisiáriu ne’e.

Nia dehan, bainhira apoiu hosi Governu mak fahe lahanesan, ne’e sei reklama tanbasá fahe la hanesan maibé ida inisiativa joventude sira nian ne’e lalika reklama.

Agora daudaun, Aldeia Virgolosa akumula xefe família hamutuk 257 no populasaun hamutuk 685.000.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here