Abitante hamu tuk 80 nebe kumpri ona loron 14 iha kuarentena iha Municipio Dili, kuarta 6 Maio governu halao seremonia deskonfinamentu iha Hotel Horizonte hodi fila ba sira nia Familia .Imajen/TATOLI

DILI, 06 maiu 2020 (TATOLI)-Governu liuhosi Ministériu Saúde, kuarta (06/05/2020) kontinua re-integra tan ema na’in 80 ba sira-nia família hafoin kumpre ona kuarentena obrigatóriu durante loron 14 hodi prevene transmisaun surtu COVID-19 iha Timor-Leste.

Timoroan ema na’in 80 ne’e kumpre ona kuarentena obrigatóriu durante loron 14 no balun besik ona fulan ida iha Otél Novo Horizonte 78, feto 25 no mane 53, Otél Loekase ema na’in ida no Otél Luxury ida.

”Ami nafatin husu ba maluk sira ne’ebé mak ohin kompleta ona rekézitu Ministériu Saúde nian iha kuarentena balun kumpre loron 14 no balun to’o loron 28 ne’e signifika katak ita hotu kontribui ba ita-nia ra’in no oinsá mak ita prevene moras COVID-19 ida ne’e,” dehan Koordenadór Destakamentu Reasaun Rápida, Aurelio Guterres, iha Otél Novo Horizonte Metiaut Dili, kuarta ohin.

Nia dehan to’o ohin loron seidauk iha ai-moruk para halo vasina ba surtu COVID-19 tanba ne’e maka ema hotu tenki kontribui nafatin hodi halo prevensaun.

Iha fatin hanesan Diretór Apoiu Jurídiku kontasiozu Ministériu Saúde, Belarmino da Silva, apela nafatin ba Timoroan hirak ne’e hodi kumpre regra distansimentu sosiál, fiziku, fase liman beibeik ho sabaun no seluk tan.

“Agora idaidak bá nia Munisípiu ita boot sira nia-isin sei hetan adaptasaun husi klima ne’ebé mak iha Munisípiu entaun imi bele hetan isin manas, kostupadu se situasaun sira ne’e akontese ba imi bele liga direita ba numeru 119 atu halo atendimentu ho lailais,” Diretór ne’e apela.

Ikusliu, Diretór Finansa Ministériu Administrasaun Estatál, Valente de Fátima Miranda, informa katak ekipa MAE servisu hamutuk ho Autoridade Munisipal idaidak hodi tula abitante hirak ho transporte to’o sira nia uma.

Antes re-integra abitante hirak ne’e ba família idaidak ohin, Ministériu Saúde mós distribui sertifikadu rekoiñesementu katak sira livre hosi moras coronavirus.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here