Administradór Postu Administrativu Cristo Rei, Gaspar da Silva. Imajen/Osória Marques.

DILI, 06 abril 2020 (TATOLI)–Administradór Postu Administrativu Cristo Rei, Gaspar da Silva informa, iha  implementasaun Estadu Emerjénsia períodu daruak ba surtu COVID-19 nian ne’e, ema barak haree ba regra Estadu Emerjénsia ne’e hanesan laiha  valór.

“Ema barak mak la kumpre regra ne’ebé Estadu dekreta ona. Agora ha’u hanoin Estadu Emerjénsia ba daruak ida ne’e, regra sira ne’e ita haree hanesan laiha valór,” dehan Administradór Postu Administrativu Cristo Rei, Gaspar da Silva, ba Ajénsia TATOLI iha nia knaar fatin, Becora, Dili, foin lalais ne’e .

Tanba, nia hatutan, agora autoridade polísia sira bainhira halo operasaun no kontrola ba komunidade sira ne’ebé halo movimentu, ema balu dehan viola ona regra umanu ka direitu umanu entaun atu dehan de’it katak fó vantajen di’ak fali ba komunidade sira.

“Buat sira hanesan mak ita hanoin ladi’ak tanba bainhira autoridade seguransa atua ema ne’ebé la kumpre regra maibé iha polítiku na’in sira dehan viola direitu umanu nian entaun komunidade la fiar ona. Nune’e, ita bele dehan ita-nia Estadu Emerjénsia la funsiona. Maibé ita hotu hatene katak moras COVID-19 ne’e perigozu tebes tanba fasil da’et no fasil hamate ema,” nia dehan.

Nia argumenta katak desizaun ladún klaru tanba ohin ko’alia ida aban hanoin seluk ona, ne’ebé desizaun halo ema konfuzaun.

“Tanba ne’e, ha’u dehan ema hotu la konsidera no la hakruuk ba desizaun regra Estadu Emerjénsia ne’ebé Estadu dekreta ona,”  nia dehan.

Ho ida ne’e, nia husu ba komunidade sira hotu liuliu ba komunidade Cristo Rei katak tenke kumpre regra Estadu Emerjénsia tanba moras ne’e mai la haree ba kór, ki’ik no boot, tanba moras COVID-19 ne’e fó ameasa ba ema-nia vida, nune’e tur hakmatek karik presiza nesesidade mak sai maibé uza máskara no fase-liman beibeik ho sabaun.

Entretantu, Administradór Postu Administrativu Atauro, Mateus Belo hateten, atu prevene COVID-19 ne’e la’ós Governu de’it mak kombate no kontrola maibé ema hotu-hotu hamutuk hodi kontribui ba Estadu no Governu ida ne’e.

“Durante ne’e Governu esforsu ona hodi kombate maibé ita mós tenke kontribui labele hein de’it. Bainhira ita hamutuk sei kombate moras COVID-19 ne’e iha ita-nia rain,” Administradór Postu Administrativu Atauro Mateus Belo hateten.

Tanba, nia dehan, ekipa pesoál Saùde iha Postu Administrativu Ataúro hamutuk iha Estadu Emerjénsia primeiru ne’e kedas halo kontrolu ba pasajeiru sira ne’ebé ba-mai sempre halo screening no rega aimoruk dezinfetante.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here