Xefe Bankada CNRT, Duarte Nunes. Imajen/Egas Cristovão

DILI, 06 maiu 2020 (TATOLI)—Xefe Bankada Congresso Nacional da Reconstrução de Timor (CNRT), Duarte Nunes, rekoñese deklarasaun bankada CNRT nian horisehik laiha orientasaun hosi lideransa partidu, Kay Rala Xanana Gusmão, maibé opiniaun hanesan reprezentante povu iha Parlamentu Nasionál.

“Atu esklarese de’it katak Konferénsia Imprensa ida horisehik ne’e laiha orientasaun hosi partidu no ida-ne’e apelu ida-ne’ebé ke hosi deputadu sira hosi Bankada tanba deputadu sira preokupa ho situasaun ne’ebé povu hasoru,” Xefe Bankada CNRT, Duarte Nunes, informa ba jornalista sira iha Parlamentu Nasionál, kuarta ne’e.

Xefe Bankada CNRT ne’e argumenta, deputadu sira halo deklarasaun ne’e tanba haree ba inserteza polítika ne’e la’o durante tinan tolu maibé to’o agora seidauk iha serteza polítika.

Se laiha orientasaun hosi lider partidu CNRT maibé tanbasá mak Bankada CNRT hasai deklarasaun hodi husu ba Prezidente-Repúblika bolu partidu rua ne’e tuur hamutuk, nia hatán, ida ne’e hanesan opiniaun hosi bankada de’it la’ós intensaun atu partidu boot rua ne’e tenke hamutuk ukun maibé apelu ida tanba partidu rua ne’e hetan mandatu hetan votu barak liu .

“Ne’e hanesan opiniaun hosi bankada de’it, la’ós intensaun atu partidu boot rua ne’e tenke hamutuk ukun maibé apelu ida tanba partidu rua ne’e hetan mandatu hetan votu barak liu. Ne’e hanesan opiniaun ami soe hela, simu ka la simu, ami hanesan reprezentante povu soe hela ba públiku maibé laiha orientasaun hosi lider partidu CNRT,” dehan Duarte Nunes.

Notísia Relevante: Pozisaun Bankada CNRT Atu Hamutuk ho FRETILIN Laiha Orientasaun hosi Lider Partidu CNRT

Jornalista : Evaristo Soares Martins

Editór       : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here