Imajen Espesiál.

DILI, 6 maiu 2020 (TATOLI)—Bankada Parlamentár tolu kompostu hosi Frente Revolucionária de Timor-Leste Independente (FRETILIN), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO) deklara lakon konfiansa ba Prezidente Parlamentu Nasionál (PPN), Arão Noé de Jesus da Costa Amaral, tanba ikus-ikus ne’e laiha konvokatóriu líder bankada hodi fixa ajenda ba plenária.

Reprezentante Bankada Parlamentár tolu atuál Vise-Xefe Bankada PLP, Francisco de Vasconcelos informa, ohin, lideransa hosi bankada parlamentár tolu, PLP, FRETILIN no KHUNTO hakarak informa ba públiku tomak katak horisehik, loron-5 fulan-maiu tinan-2020, hatama tiha ona pedidu ba meza Parlamentu Nasionál atu husu ajendamentu ba votasaun ba destituisaun Prezidente Parlamentu Nasionál ida agora.

“Pedidu destituisaun ida-ne’e ami hato’o tuir dalan ne’ebé Rejimentu Parlamentu Nasionál fó iha artigu 16-B kona-ba Destituisaun Prezidente Parlamentu Nasionál, nu’udar membru Parlamentu, ami lakon ona konfiansa ba señor Arão Noé nu’udar Prezidente Parlamentu Nasionál tanba ikus-ikus ne’e laiha ajenda ba plenária,” Reprezentante Bankada Parlamentár tolu atuál Vise-Xefe Bankada PLP, Francisco Vasconcelos, informa liuhosi Konferénsia Imprensa iha sala Bankada FRETILIN, iha Parlamentu Nasionál, kuarta ne’e.

Bankada tolu ne’e lakon konfiansa no konsidera Prezidente Parlamentu Nasionál dala barak liu ninia komportamentu la’ós hanesan Prezidente hosi Órgaun Soberanu maibé komporta liu fali hanesan nia Prezidente Bankada CNRT.

Tuir Lei Organizasaun no Funsionamentu Administrasaun Parlamentár (LOUFAP), prezidente Parlamentu nia knaar ida mak atu konvoka Konsellu Administrasaun Parlamentu nian bainhira halo desizaun ruma kona-ba programa, polítika no rekursu Parlamentu nian ligadu ba kestaun administrativu. Iha momentu balun ne’ebé prezidente Parlamentu viola tiha lei ida-ne’e la konvoka Konsellu Administrativu maibé nia halo desizaun mesak de’it.

“Públiku bele haree momoos katak iha semana ida-ne’e no semana kotuk, ami deputadu sira mai iha-ne’e maibé la konsege halo serbisu ida maibé sei kontinua simu osan. Ida-ne’e mak ema dehan “deputadu sira simu gaji buta.” Ida-ne’e tanba saida. Nafatin tanba inkapasidade Prezidente Parlamentu Nasionál nian,” dehan Deputadu Francisco de Vasconcelos.

Bankada tolu ne’e konsidera Prezidente Parlamentu Nasionál, Arão Noé, nia hahalok hatudu tentativa atu paraliza Parlamentu Nasionál hodi labele funsiona ho normál.

“Ida-ne’e ironia boot ida tanba sira hakarak atu lori ita ba fali eleisaun antesipada iha momentu ida-ne’ebé ita-nia povu no ita-nia Estadu enfrenta hela dezafiu globál surtu coronavirus maibé Arão Noé no bankada Parlamentár CNRT hakarak lori ita ba filafali eleisaun antesipada. Ami deputadu sira hosi bankada tolu ne’e hato’o rekerimentu ba destituisaun Prezidente Parlamentu Nasionál nian ho intensaun ida de’it, atu Parlamentu Nasionál bele funsiona normál filafali, hodi bele hala’o serbisu ba Estadu no povu to’o ami-nia mandatu ramata,” nia dehan.

Deklarasaun konjunta ne’e parte Bankada FRETILIN reprezenta hosi Vise-Xefe Bankada, Francisco Miranda Branco, PLP nian reprezenta Vise-Xefe Bankada, Francisco de Vasconcelos, KHUNTO nian reprezenta hosi Deputada Olinda Guterres no Deputadu António Verdiál de Sousa.

Notísia Relevante: Bankada FRETILIN, PLP no KHUNTO Hatama Ona Rekerimentu Destituisaun Ba Meza PN

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here