Portavós Traballadór Kompañia Lisun, Paulina Ximenes. Imajen Tatoli/Joanico de Araújo

DILI, 05 maiu 2020 (TATOLI) – Traballadór kompañia Lisun lamenta ho saláriu ne’ebé sira hetan durante períodu Estadu Emerjénsia la kompletu, maibé antes ne’e tuir esplikasaun jerente kompañia katak sei simu kompletu.

Tuir Portavóz Traballadór Kompañia Lisun, Paulina Ximenes, antes ne’e jerente kompañia dehan sei simu saláriu kompletu (full) maski servisu ho oras ne’ebé determina ona (shift).

“Ami-nia hakarak iha klarifikasaun husi jerente sira rasik, maibé sira rasik la fó oin mai ami. Señora nia esplikasaun dehan sira ne’ebé servisu shift sei simu kompletu no ba sira ne’ebé servisu full mós sei simu kompletu. Maibé realidade ami simu osan la kompletu no ida servisu full maka simu kompletu. Ami-nia hakarak ami simu tuir ami-nia direitu tanba ami nia devér halo ona”, dehan traballadór ho pozisaun Marketing ba Agência Tatoli iha edifísiu Kompañia Lisun, Fatuhada, tersa ne’e.

Nia adianta, durante Estadu Emerjénsia kompañia hahú aplika polítika servisu tuir oras ne’ebé determina ona hodi bele halo distansiamentu sosiál, nune’e evita propagasaun COVID-19.

“Iha Estadu Emerjénsia ami garantia de’it maka saláriu, maibé kompañia ko’a hotu. Ami garantia katak ami shift ne atu simu porsentu 100 maibé realidade ami simu loron-neen ne’ebé ami serbisu. Ba ami ida-ne’e hanesan violasaun boot ida tanba la’ós ami maka hakarak la tama servisu maibé polítika husi jestór kompañia nia maka haruka”, nia salienta.

Notísia Relevante: Governu Planeia Fó Subsídiu ba Traballadór 30.000 Iha Períodu Estadu Emerjénsia

Xefe Estadu Promulga Dekretu-Lei 3 ba Apoiu Surtu COVID-19

Daudaun ne’e, ida servisu tuir shift iha Kompañia Lisun kuaze ema na’in-100 resin, enkuantu servisu oras kompletu la to’o ema na’in-20 (xefe no jerente sira) no sira la tama kuaze na’in-10.

“Sira ne’ebé la tama liu balun simu porsentu 60 maibé balun la simu. Ami iha ne’e simu la hanesan. Ami nia rekursu umanu orseik esplika sé maka tama shift nia simu tuir oras maibé se maka tama servisu oras kompletu nia simu full”, nia realsa.

Nia refere liután, traballadór iha Kompañia Lisun nia saláriu kuaze $115 hotu, tanba ne’e bainhira servisu ho oras la kompletu sura loron de’it no seluk ko’a ba oras servisu.

“Balun la tama liu ko’a to’o $101,25. Iha kolega ida nia saláriu loloos $115, nia tama shift maibé nia saláriu hetan ko’a tuir absensia hamutuk $82,80 nune’e nia simu de’it $32,20”, nia akresenta.

Tanba ne’e, traballadór sira iha Kompañia Lisun hakarak Governu esplika subsídiu porsentu 60 ne’e maizumenus la’o oinsá.

“Atu nune’e ami hatene katak porsentu 60 ne’e husi Governu no porsentu 40 husi kompañia. Tanba ami lahatene kona-ba kestaun ne’e. Ami hakarak hatene tanba ami halo ona ami nia devér ne’ebé servisu ona”, nia subliña.

Nia mós husu ba ministériu ne’ebé implementa polítika subsídiu traballadór husi Governu antes implemeta tenke haree uluk ba kondisaun traballadór no labele haree liu ba osan na’in sira.

“Hanesan ne’e ita hanesan atu hanehan fali traballadór”, nia lamenta.

Liga ba kestaun ne’e, Jornalista Agência Tatoli tenta konfirma ho na’in Kompañia Lisun maibé nia parte lakohi fó kometáriu.

Antes ne’e, Governu liuhosi desizaun Konsellu Ministru aprova planu sosio-ekonómiku hodi hatan ba efeitu negativu husi pandemia COVID-19.

Ministru Koordenadór Asuntu Ekonmiku interinu, Fidelis Manuel Leite Magalhães, informa subsídiu salariál ba traballadór katak empreza sei selu porsentu 40 no Governu sei selu porsentu 60, maibé atu hetan ida-ne’e, traballadór sira tenke hola parte iha seguransa sosiál.

“Empreza sira labele demite ka hasai sira-nia traballadór durante Estadu Emerjénsia”, nia adianta.

Governante ne’e dehan, Governu sei halo mós inzensaun katak halakon pagamentu ba kontribuisaun ba seguransa sosiál husi parte traballadór nian ne’ebé durante ne’e traballadór kontribui ona porsentu 40 no empreza porsentu 60 durante períodu Estadu Emerjénsia.

“Governu sei halo izensaun katak sei perdua tiha pagamentu ba kontribuisaun ba seguransa sosiál husi parte traballadór nian, durante períodu Estadu Emerjénsia. Governu sei la kobra, ne’ebé traballadór sira sei hetan saláriu kompletu tanba Governu la ko’a, ida ne’e ninia medida ba implementasaun aprovadu hotu iha Konsellu Ministru”, katak Fidelis.

Prezidente Repúblika, Franscisco Guterres ‘Lú Olo’ promulga ona Dekretu-Lei tolu ne’ebé inklui Dekretu-Lei númeru 16/2020 30 abríl kona-ba medida apoiu empregu iha ámbitu pandemia COVID-19.

Dekretu ne’e haktuir, subsídiu estraordináriu sei aplika ba traballadór bainhira iha kazu suspensaun kontratu traballu ka redusaun oras traballu tanba kauza husi pandemia COVID-19.

Polítika ne’e hahú implementa sura husi marsu 2020 to’o Estadu Emerjénsia ramata.

Tuir informasaun, pagamentu retroativu marsu no abríl ba subsídiu porsentu 60 husi Governu ba traballadór sira sei akontese iha fulan-maiu nia klaran, enkuantu pagamentu subsídiu ba maiu sei akontese iha jullu.

Pagamentu sei liuhosi transferénsia konta bankária ba benefisiáriu ne’ebé rejista ona iha seguransa sosiál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here