Ekipamentu prevensaun COVID-19 nebe ajuda husi Governu Xina, SAMES distribui ona ba Munisipio sira para mediku sira utilija hodi halao servisu prevensaun ba COVID-19. Imajen/António Gonçalves

DILI, 05 maiu 2020 (TATOLI)-Ekipa Tékniku husi Servisu Autónomu Medikamentu no Ekipamentu Saúde (SAMES) daudaun ne’e distribui ona ekipamentu protesaun pesoál (PPE-sigla inglés) hodi prevene transmisaun surtu COVID-19 ba Sentru Saúde, Ospital Referál, Ospitál Nasionál, iha Munisípiu 12 inklui Rejiaun Autónomu Espesiál Oé-Cusse Ambeno (RAEOA).

Diretór Ezekutivu SAMES Santana Martins, hateten prosesu distribuisaun ne’e hahú ona iha kinta semana kotuk hodi distribui ona thermoscan no tersa (05/05/2020) ohin, kontinua halo tan ba faze rua.

Ba faze rua nian, ekipa tékniku distribui materiál hanesan maskra, luvas, oklu, roupa protesaun no seluk tan.

Notísia Relevante :Governu Timor-Leste Simu Doasaun Kombate COVID-19 Husi Governu Xina

”Bazeia ba planu ne’ebé mak servisu hamutuk ho Ministériu Saúde liuhusi Diresaun Nasionál Servisu Ospitalár no mós Diresaun Nasionál Farmasia no Medikamentu define nia kuantidade ne’ebé mak ita atu halo distribuisaun ba Munisípiu sira,” dehan, Santana Martins ba Jornalista sira iha ninia servisu fatin Kampung-Alor Dili.

Ekipa haat maka desloka ona bá munisípiu hodi halo distribuisaun ba materiál protesaun hirak ne’e.

“Ekipa ida mak hahú sai husi Dili ba iha Rejiaun Leste mak hahú kedas ona iha Hera, Manatutu, Viqueque, Baucau, no Lautem,” nia hatutan.

Ekipa daruak, sei kobre Munisípiu Aileu, Maubisse, Manufahi, Ainaro, no Covalima. Ekipa datoluk hahú husi Dili, Ermera, Liquiça, no Bobonaru.

No ekipa ikusliu bá iha RAEOA, tanba tuir planu distribuisaun komesa tersa ohin no ramata iha kinta (07/05/2020), bainrua.

”Ha’u hanoin ida ne’e mak atividade ne’ebé ita halo ita koko halo distribisaun ida balansu tanba ita hatene katak ita-nia estoke ne’e limitadu entaun oras ne’e ita halo distribuisaun bazeia ba nesesidade ne’ebé mak Ministériu Saúde kálkulu,” realsa Santan Martins.

Tuir planu SAMES nian kada produtu ne’ebé distribui bá kada munisípiu ho totál pakote 100. Maibé nia dehan, sira prepara estoke barak liu iha fatin izolamentu Sentru Saúde Vera Cruz ho HNGV.

Timor-Leste iha ona Sentru Saúde 70 inklui Sentru Saúde Internamentu sira ne’ebé maka estabelese iha Munisípiu sira, Dili no RAEOA.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here