Diretor Servisu Saude Regional Oecuse Luis de Jesus Neno.Imajen/Antonio Goncalves

DILI, 05 maiu 2020 (TATOLI)-Diretór Servisu Saúde Rejionál Oé-Cusse, Luís de Jesus Neno hateten Prezidente Autoridade Rejiaun Autónomu Espesiál Oé-Cusse, Ambeno José Luís Guterres, entrega ona Otél Fitun Lima, iha RAEOA hodi sai fatin kuarentena obrigatóriu ba sidadaun sira hodi prevene transmisaun surtu COVID-19.

”Governu liuhosi Prezidente Autoridade RAEOA fó orientasaun ba ami no entrega ótel ne’e sai fatin kuarentena,” hateten, Luís de Jesus Neno ba jornalista sira iha edifísiu SAMES Kampung-Alor, Dili, tersa ohin.

Maski abitante sira okupa ona fatin ne’e, maibé nia la esplika detalla ba públiku kona-ba ema na’in hira maka daudaun ne’e kumpre hela kuarentena obrigatóriu iha fatin refere.

Kona-ba fatin izolamentu Servisu Saúde Oé-Cusse iha ona planu sei uza klínika kurasaun hodi izola pasiente COVID-19.

“Situasaun COVID-19 iha RAEOA la’o ho di’ak tanba ita iha ekipa ne’ebé mak organizadu no hotu-hotu hala’o atividade no agora daudaun iha RAEOA suspeitu ba COVID-19 ne’e sei iha negativu ,” tenik Diretór Servisu Saúde RAEOA ne’e.

Atu prevene transmisaun surtu coronavirus iha komunidade nia le’et, ekipa saúde kontinua tama sai bairu hodi sensibiliza informasaun ba komunidade atu oinsá kontribui ba prevensaun moras coronavirus iha RAEOA.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here