Sekretariu Estadu Protesaun Sivíl (SEPS), Joaquim José Gusmão dos Reis Martins. Imajen/Egas Cristovão

DILI, 05 maiu 2020 (TATOLI)Primeiru-Ministru (PM), Taur Matan Ruak, konvoka reuniaun ho Ministru Agrikultura no Peska, Joaquim José Gusmão dos Reis Martins, hodi orienta Ministériu Agrikultura no Peska (MAP) asegura ai-han iha rai-laran ligadu ho surtu COVID-19 iha Timor-Leste.

Durante enkontru, Xefe Governu husu ba Ministru Joaquim relasiona ho planu no programa MAP no saida mak sei halo iha tempu oin.

“Primeiru-Ministru bolu ha’u mai atu ko’alia kona-ba programa Ministériu Agrikultura no Peska nian, liuliu haree ba iha ita-nia preokupasaun kona-ba COVID-19 ne’ebé mak akontese. Ita hotu hatene katak seguransa ai-han iha rai-laran sai hanesan preokupasaun boot ida, tanba ne’e Primeiru-Ministru hakarak atu hatene medida saida maka MAP foti ona, saida mak komesa halo ona, no saida tan mak sei halo ba oin nune’e bele asegura seguransa ai-han iha rai-laran no mós bele motiva agrikultór sira”, relata Ministru Joaquim hafoin reuniuan ho PM Taur iha Palásiu Governu, tersa ne’e.

Governante ne’e adianta, MAP hatama ona proposta ba Konsellu Jestaun Fundu COVID-19 hodi hetan aprovasaun ba utilizasaun Fundu nian iha ámbitu prevensaun no metigasaun ba surtu COVID-19.

“MAP hatama ona proposta hodi utiliza orsamentu COVID-19 nian, maibé hein daudaun prosesu aprovasaun. Ami hahú ona mobiliza mákina, tanba MAP iha eskavatór neen maibé haat de’it mak funsiona ho di’ak. Ami komesa fahe ona ba iha área irigasaun boot sira liuliu iha parte leste nian iha área irigasaun boot hanesan Bebui no balun konsentra ba irigasaun Karau-Ulun atuhalo normalizasaun ba iha kanál irigasaun sira ne’ebé mak iha”, nia salienta.

Durante tinan tolu nia-laran laiha orsamentu atu halo normalizasaun ba irigasaun, tanba ne’e halo de’it normalizasaun urjénsia.

“Tanba ne’e iha 2020 tau osan oituan atu halo manutensaun ba iha kanál irigasaun boot sira ne’e maibé osan la pasa”, nia dehan tan.

Tuir proposta MAP nian ba utilizasaun Fundu COVID-19 hamutuk millaun $4,9 maibé osan ne’e la’ós de’it atu asegura ai-han, maibé fó apoia mós asosiasaun sira ne’ebé mak hamahan-an iha loja agrikultór sira.

“Ami tenta atu jere didi’ak orsamentu atu sufisiente tanba ita servisu iha segunda époka, iha ne’e ita hatene katak bee mós komesa tun oituan. La másimu iha ita-nia produsaun, tanba ne’e maka orsamentu ne’ebé mak iha planeamentu ne’e adekuadu, maibé osan ne’e la’ós ba de’it agrikultura maibé hakarak apoia mós ba loja agrikultór, apoia asosiasaun sira ne’ebé hamahan-an iha loja agrikultór no transporta produtu hosi munisípiu mai loja agrikultór no merkadu nasionál tanba iha períodu Estadu Emerjénsia susar tebes sira atu asesu mai merkadu, nune’e mós apoia ba área peska no pekuária”, nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here