Taxista António Kui. Imajen Tatoli/Joanico de Araújo

DILI, 05 maiu 2020 (TATOLI) – Motorista transporte públiku sira husu Governu atu apoiu subsídiu ruma hodi sira bele uza durante períodu Estadu Emerjénsia relasiona COVID-19 tanba sira laiha osan atu sustenta nesesidade família kada loron.

Taxista António Kui, hateten durante Estadu Emerjénsia nia laiha osan atu sustenta ona família.

“Ami-nia servisu maka kaer taxi halai bá mai maka hetan netik osan oituan, maibé iha Estadu Emerjénsia ne’e ami araska tanba loron ida la hetan osan nein sentavu lima tanba taxi la halai no ami labele ona sustenta família uma-laran tanba osan laiha, moris iha Dili folin karun ne’ebé araska. Ami husu Governu nia apoiu”, tenik taxista ne’e ba Agência Tatoli iha Lecidere, tersa ne’e.

Nia dehan, tempu bain-bain bainhira laiha situasaun COVID-19 no Estadu Emerjénsia, taxi halai loron ida bele hetan $50 to’o $80, maibé iha situasaun ne’e rendimentu menus to’o dalaruma laiha.

“Tanba momentu ne’ebá desde husi fulan-marsu mai oin, transporte públiku hotu paradu no la halo opersaun tanba tenke kontribui ba prevensaun COVID-19 no Estadu Emerjénsia, tanba ne’e la permite atu halo operasaun”, nia akresenta.

Maski nune’e, António Kui sente kontente iha Estadu Emerjénsia faze daruak bele halo fali operasaun maski pasajeiru menus.

“Coronavírus halo ita triste maibé ohin no horiseik ha’u kontente tanba ha’u bele halo operasaun, ne’ebé bele tula fali pasajeiru maski rendimentu menus. Ha’u promete sei halo tuir regra sira atu nune’e bele prevene-an husi moras ne’e”, nia salienta.

Nia parte prepara ona dokumentu atu hetan subsídiu husi Governu no submete ona ba Ministériu Solidaridade Sosiál no Inkluzaun (MMSI) hodi bele hetan osan oituan hodi sustenta nesesidade uma laran.

Sorin seluk, Motorista Mikrolete Dirasaun 010 Tasi-Tolu – Bidau, Agostinho Alberto Carlos, hateten durante ne’e nia la halai Mikrolete kleur ona tanba ne’e laiha osan atu sustenta moris.

“Ha’u hela iha kos ho família no sente araska tanba osan laiha. Tanba ne’e hakarak husu ba Governu karik bele fó apoiu ba ami motorista osan oituan tanba durante fulan-ida situasaun COVID-19 no Estadu Emerjénsia ami la halo buat no iha uma de’it”, dehan mororista transporte públiku ne’e ba Agência Tatoli, iha Lecidere.

Nia haktuir, iha loron hirak liubá hamutuk ho maluk motorista sira hato’o ba Governu karik bele fó subsídiu oituan tanba motorista barak maka laiha osan atu sustenta família.

“Ami foin daudaun ba hatama dokumentu iha MMSI hodi husu apoiu subsídiu ne’ebé Governu dehan atu fó ba populasaun, ami tenke esforsu hodi hetan netik mós subsídiu ne’e hodi bele sustenta ami-nia família sira iha uma, liu-liu ba nesesidade sira”, nia subliña.

Antes ne’e, Ministru Koordenadór Asuntu Ekonómiku, Fidelis Manuel Leite Magalhães, informa motorista transporte públiku bele hetan subsídiu tanba hetan impaktu hotu husi kondisaun COVID-19 no Estadu Emerjénsia.

“Atu dehan mós katak iha pakote sosio-ekonómiku mós inklui ona medida ba ita-nia maluk sira ne’ebé sai vítima liu durante ne’e, hanesan motorista, taxista sira, kondutór sira ne’ebé Governu verifika hela dadus sira ne’e maibé sira mós sei sai alvu importante ida husi prosesu ne’e”, nia salienta.

Aleinde ne’e, motorista transporte públiku iha posibilidade hetan subsídiu ba uma-kain $100 ba kada fulan durante períodu Estadu Emerjénsia, tanba motorista sira kuaze iha rendimentu menus husi $500, ne’ebé tuir rekezitu atu asesu ba subsídiu ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here