Administradór Postu Administrativu Cristo Rei, Gaspar da Silva. Imajen/Osória Marques.

DILI, 05 maiu 2020 (TATOLI)–Administradór Postu Administrativu Cristo Rei, Gaspar da Silva, hateten nia simu ona orientasaun hosi Ministériu Administrasaun Estatal  (MAE) no Prezidente Autoridade Munisípiu Dili katak atualiza baze dadus ba família uma-kain nian hodi submete ba parte relevante sira atu bele prosesa ona.

“Orientasaun maihosi ita-nia Ministériu Administrasaun Estatál no Prezidente Autoridade Munisípiu Dili katak oinsá mak Postu Administrativu sira atualiza baze dadus ba família uma-kain sira. Nune’e, agora ita hala’o hela prosesu no ami mós fó ona orientasaun ba ita-nia Xefe Suku no Xefe Aldeia sira hodi halo levantamentu dadus uma-kain nian,” dehan Administradór Cristo Rei, Gaspar da Silva, ba Ajénsia TATOLI iha nia knaar fatin Becora, Dili, tersa ne’e.

Nia hatutahn, atu prosesa dadus família uma-kain nian tenke liuhosi kritériu haat (4) mak ema ne’e tenke kaben barlakeadu, iha kartaun eleitorál, fixa família no sertidaun kazamentu nian.

“Ema sira ne’ebé iha direitu mak ema ne’ebé mak forma família maibé tenke liuhosi kritériu haat (4) hanesan kaben barlakeadu, kartaun eleitorál, fixa família no sertidaun kazamentu nian tanba ita mós tenke hatene katak subsídiuu ne’ebé iha ba uma-kain sira de’it,” nia dehan.

Nia informa, populasaun balu ne’ebé hela duni iha aldeia no suku refere mak sira-nia kartaun eleitorál hosi fali munisípiu seluk nian entaun ida ne’e parte Cristo Rei halo ba lista adisionál nian. Tanba, durante ne’e sira hela iha fatin ne’e entaun tenke tau iha konsiderasaun.

“Ita-nia polulasaun balu ne’ebé mak durante ne’e eskola ka serbisu no buka moris mak hela iha parte Cristo Rei nian maibé eleitorál hosi munisípiu seluk nian entaun ita kategória sira hanesan adisionál maibé prosesu no desizaun iha Governu nia liman,” nia hateten.

Razaun, nia fortifika, foti populasaun hirak ne’e nia lista sai lista adisionál tanba agora Estadu Emerjénsia ne’ebé halo ema labele halo movimentu la’o ba-mai ka la’o sai.

Nia infroma, total família Uma-Kain Postu Administrativu Cristo Rei hamutuk 14.948 no lista adisional hamutuk 538 uma-kain kompostu hosi Suku Camea iha 3109 uma-kain no adisionál 231, Hera 2708 ho nia adisionál 270, Metiaut hamutuk 438 uma-kain no adisionál iha uma-kain 37,  Ailok iha 837 família, Balibar 347 no Bidau Santa-Ana hamutuk 1460 no Bekora 4.306 no Suku Culuhun 1.743, ne’ebé mak hatama ona lista subsidiu.

“Dadus hirak ne’e, tuir panu, ohin sei submete ba Autoridade Munisípiu Dili hafoin sira submete fali ba Ministériu Administrasaun Estatál atu halo verifikasaun,” nia informa.

Iha prosesu halo levantamentu dadus ne’e, nia dehan, autoridade lokál sira enfrenta difikuldade tanba komunidade barak no komunidade balu mak lakohi interese hodi halo fixa família, hafoin rona informasaun ho kanál televizasaun, jornal no online mak foin halo.

“Entaun, problema no difikuldade boot ba ami liuliu ba autoridade lokál sira, nune’e ami uza mekanizmu ida mak ha’u orienta Xefe Suku no Xefe Aldeia sira mak ba direta komunidade sira hodi rekolla dadus tanba Estadu Emerjénsia ema labele halo movimentu. Autoridade de’it mak durante ne’e halo movimentu no komunidade sira la’e. Maibé komunidade balun ulun-fatuk toos hakarak halo lalais entaun sira mai diretamente lori fixa família hodi entrega,” nia esplika.

Jornalista : Osória Marques

Editór     : Cancio Ximenes

1 KOMENTÁRIU

  1. Hau hakarak hatene lia tetun, nune hau husu Tatoli hatudu mai hau nia email para hau lebele haluha lia tetun, uluk hau iskola iha smak st.yosep dili- ami nia kepal sekolah pater leao, agora beliau mate tiha ona, ne mak hau husu ita bot bele hatoo TATOLI iha hau nia email mail. Fo Obrigado barak ba ita nian atensaun mai hau…

HAKEREK NO HATÁN

Please enter your comment!
Please enter your name here