Xefe Bankada,CNRT Duarte Nunes. Imajen/Egas Cristovão

DILI, 5 maiu 2020 (TATOLI)—Xefe Bankada Partidu Congresso Nacional da Reconstrução de Timor (CNRT), Duarte Nunes hateten, Partidu CNRT no FRETILIN iha responsabilidade boot liu hamriik iha povu nia oin atu hakotu inserteza polítika iha rai-laran.

Tanba ne’e, Duarte Nunes husu ba Prezidente Repúblika, Francisco Guterres ‘Lú Olo’ atu bolu partidu boot rua ne’e tuur hamutuk hodi solusiona impase polítika ne’e.

“Tanba povu fiar liu mak partidu rua ne’e, ne’e espresaun hanesan reprezentante povu. Husu ba partidu boot rua ne’e oinsá mak tuur hamutuk tanba sira mak iha responsabilidade boot liu, povu fó fiar ba sira, husu ba partidu kiik-oan sira-ne’e halo nusá. Ida-ne’e mak ami-nia pozisaun katak tempu ona partidu boot rua ne’e hanesan dalan atu oinsá mak rezolve problema ne’ebé povu enfrenta,” dehan Duarte Nunes, liuhosi konferénsia imprensa iha sala Bankada CNRT, iha Parlamentu Nasionál, tersa ne’e.

“Sé ita haree ba konjuntura foun ne’e tenke iha forsa rezolve problema ne’e, sé lae kiik sira-ne’e ohin hamriik iha ne’e, aban hamriik iha sorin mas ita haluha tiha povu fó fiar ba ita buka solusaun ba sira-nia moris, agora ita hanesan ne’e de’it,” nia dehan.

Duarte Nunes la dehan partidu boot rua ne’e mak fó solusaun ba impase polítika maibé partidu boot rua ne’e iha responsabilidade boot liu.

Nia hatutan, atu partidu rona ka la rona bankada nian maibé nu’udar reprezentante povu tenke ko’alia hodi fó solusaun ba impase polítika ne’e.

“Partidu boot rua ne’e hamutuk kadeira 44 ona, sira hakarak ka lae, sira iha responsabilidade hamriik iha povu nia oin. Prezidente-Repúblika hanesan Xefe Estadu iha obrigasaun tomak tuir konstituisaun atu haree solusaun ba problema sira-ne’ebé mosu,” nia dehan.

Notísia Relevante: Bankada CNRT Husu PR Bolu FRETILIN no CNRT Solusiona Impase Polítiku

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here