Husi liman karuk – Joana Saraiva, Delegada Fundasaun Oriente nian iha Timor-Leste, Gerson Araújo no Inocência Merelis do Rosário, ne’ebé hetan pozisaun daruak no dauluk; Paulo Lopes, Diretór Jerál BNU nian; Paulo Faria, Kordenadór Sientífiku-Pedagójiku Projetu FOCO UNTL no prezidente ba júri VII PLP, 2020. Imajen hosi mídia Fundasaun Oriente

DILI, 5 abríl 2020 (TATOLI) – Fundasaun Oriente anúnsiu vensedór sira ba Prémiu dahitu lian-portugés 2020 ho manan nain estudante nain rua ne’ebé sei tuir formasaun lian-portugés durante fulan ida iha universidade, Portugal.

Manan nain ba 2020; Inocência Merelis do Rosário Osório, estudante kuartu anu iha Departamentu Língua Portugeza, Fakuldade Edukasaun, Universidade Nasionál Timor Lorosa’e (UNTL), hetan primeiru lugar, ho ninia kontu “Builai no mar azul”, enkuantu Gerson Armindo da Silva Leite Araújo, estudante kintu anu Fakuldade Direitu, UNTL nian, hatama ba konkursu ninia testu “Henrique no país de outro mundo”, hodi hetan segundu lugar.

Joven estudante timoroan sira na’in rua ne’e sei hetan viajen ida ba Portugál hodi partisipa iha Kursu Língua no Kultura Portugéza nian iha universidade ida, ho durasaun fulan ida no despeza sira hotu kobre iha prémiu ne’e. Aleinde ne’e, kandidatu sira ne’ebé hetan pozisaun 3.º, 4.º no 5.º sei hetan kursus lian portugés, neébé sei halaó iha Delegasaun Fundasaun Oriente iha Dili.

Tuir komunikadu ne’ebé TATOLI simu hosi mídia Fundasaun Oriente, kontestu atuál relasiona ho pandemia mundiál covid-19 nian, data ba realizasaun kursu sira ne’e hotu seidauk bele konfirma loloos, maibé prémiu sira ne’e Fundasaun Oriente assegura hela ba sira hodi uza bainhira situasaun permite.

Prémiu ba konkursu ne’e mak hakerek lian portugés, no partisipa husi joven, estudante timoroan sira ho idade entre 18 to’o 24, ne’ebé hala’o kada tinan.

Dezde tinan-2013, bainhira prémiu literáriu ida ne’e hahú, joven sira hamutuk 15 hetan viajen no frekuenta ona kursu iha universidade sira iha Macau no Portugal.

“Prémiu lian-portugés Fundasaun Oriente sai hanesan atividade ida ne’ebé ami iha kariñu espesiál iha ami-nian delegasaun, no durante tinan hirak ne’e partisipa husi joven timoroan bar-barak. Susesu ida ne’e ami hetan liuhusi entuziazmu no korajen partisipante sira-nian, ho tan ho apoiu husi ami nia parseiru sira ne’ebé fó tulun ba atividade ne’e mak hanesan Embaixada Portugál nian iha Díli, Instituto Camões, BNU no Sentru Língua Portugesa iha Universidade Nasionál Timor Lorosa’e nian”, dehan Delegada Fundação Oriente nian iha Timor-Leste, Joana Saraiva.

Nota komunikadu ne’e haktuir durante fulan-fevereiru foin lalais ne’e, fó tulun ba partisipante sira na’in-25 bele dezenvolve liután sira-nia téknika narrativa.

Ofisina ne’e hanorin iha sistema online husi eskritór sira na’in tolu ne’ebé naran boot iha literatura: Filinto Elísio, husi Cabo Verde, Gonçalo Tavares, husi Portugal, no Ondjaki, husi Angola. Fasilitadór ba enkontru sira-ne’e maka Dr. Paulo Faria, kordenadór sientífiku-pedagójiku projetu FOCO UNTL, ne’ebé mós sai hanesan prezidente ba painel júri, hamutuk ho espesialista sira na’in haat sira-seluk: Cláudia Taveira, formadora husi Consultório da Língua para Jornalistas; Isaura Lemos, jornalista husi diário Timor Post; João Paulo Esperança, linguista no tradutór; ho Prof. Maria da Cunha, Koordenadora husi Departamentu Língua Portugesa UNTL nian.

Kontu sira ne’ebé kandidatu sira hatama ne’e hetan avaliasaun iha sistema anonimato ka júri sira la hatene autor sira sé-sé mak hakerek. Tema ne’ebé propoin ba konkursu tinan ida ne’e mak: […] “E viu-se a terra inteira, de repente, Surgir, redonda, do azul profundo.” Fernando Pessoa.

Tinan-tinan rezultadu vensedór sira ba prémiu fó-sai iha serimónia ida ne’ebé realiza iha ámbitu programa selebrasaun loron lian-portugés no kultura Komunidade Nasaun sira ne’ebé ko’alia dalen portugés (CPLP, sigla portugés), ne’ebé komemora iha loron 5-fulan maiu.

Tinan ne’e, data ida ne’e hetan importánsia boot liután tanba iha novembro tinan kotuk UNESCO deklara loron ne’e sai hanesan loron mundiál ba lian-portugés, hodi integra kalendáriu ofisiál UNO nian hodi eleva importáncia internasionál ba lian ne’e, ne’ebé hanesan ligasaun entre nasaun sira-ne’ebé inklui iha CPLP.

Testu sira ne’ebé hetan pozisaun 1-5 iha prémiu sei publika iha loron-5, fulan-maiu, no bele lee kompletu iha pájina Fundação Oriente em Timor-Leste iha Facebook, mak hanesan tuir mai: 1º lugar – Inocência Merelis do Rosário Osório, estudante do quarto ano do Departamento de Língua Portuguesa da Faculdade de Educação da UNTL. Testu: “Builai no mar azul”. 2º lugar – Gerson Armindo da Silva Leite Araújo, estudante do quinto ano da Faculdade de Direito da UNTL.

Testu: “Henrique no país de outro mundo”. 3º lugar – Alexandrina Sousa dos Santos, estudante do primeiro ano do Departamento de Medicina Geral da Faculdade de Medicina e Ciências da Saúde da UNTL. Testu: “Para além do que os olhos veem”. 4º lugar – Ana de Jesus da Costa Xavier, estudante do terceiro ano da Faculdade de Direito da UNTL. Testu: “Oceano de Curiosidades”. 5º lugar – Nicolau Alves Moreira, estudante do terceiro ano da Faculdade de Ciências Exatas da UNTL. Testu: “A viagem no mar”. (ki)

HAKEREK NO HATÁN

Please enter your comment!
Please enter your name here