Negosiante Merkadu Manleuana hahú uza parasol. Imajen/UNICEF Timor-Leste

DILI, 04 maiu 2020 (TATOLI) – Fundu Organizaun Nasaun Unida ba Labarik (UNICEF, sigla inglés) no Organizasaun Mundiál ba Ai-han (WFP, sigla inglés), apoiu parasol hamutuk 50 ba negosiante Merkadu Manleuana, nu’udar jestu atu negosiante sira kumpre distansiamentu fíziku entre sira, nune’e prevene-an husi propagasaun surtu COVID-19.

“Ita hetan apoiu materiál husi UNICEF no WFP, iha sesta ne’e no ita fó ona apoiu ba merkadu  Taibesi iha 50 parasol no ohin ita kontinua fó ba Merkadu Manleuna 50 parasol”, informa Adjuntu Prezidente Autoridade Munisipiu Dili, José Smith, iha Merkadu Manleuana, segunda ne’e.

Nia adianta, apoiu ne’e nu’udar jestu ida atu negosiante sira iha Merkadu Manleuana  kontinua kumpre no mantein distansiamentu fíziku entre sira, nune’e bele preve-an husi moras COVID-19 tanba moras ne’e nu’udar moras ne’ebé afeta ba saúde públika ema nian.

Nune’e, Adjuntu Prezidente Autoridade Munisípiu Dili ne’e husu ba Jestór Merkadu Manleuana atu halo identifikasaun nune’e kuandu presiza ba tan parasol, parte Autoridade Munisípiu Dili sei kolabora ho parseiru dezenvolvimentu sira atubele apoiu nafatin.

Iha sorin seluk, Diretora Saúde Munisípiu Dili, Agostinha Sagurado, informa apoia 50 parasol ne’e nu’udar apoiu husi parseiru dezenvolvimentu, nune’e negosiante sira bele kumpre ditansiamentu fíziku.

“Ita hetan apoiu mós husi parseiru dezenvolvimentu Timor-Leste hodi apoia ba negosiante sira hodi mantein distansimentu sosiál no fíziku iha merkadu Manleuana rasik”, nia akresenta.

Nia apela ba negosiante sira atu fase liman bebeik bainhira kaer buat ruma no hamos ambiente fa’an fatin atu kontribui ba ijiene saúde públika, nune’e hadook-an husi surtu COVID-19.

Nune’e mós, Negosiante Merkadu Manleuana, Manuela da Silva, agradese ba apoiu ne’e no promete sei mantein distánsia fízika bainhira  halo atividade negósiu.

Tuir observasaun, hafoin simu apoiu ne’e, negosiante sira hahú monta ona parasol no ida-idak hahú tur dook malu ho distánsia metru ida no negosiante sira hotu kuaze kumpre regra uza máskara durante hala’o atividade negósiu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here