Ministru Koordenadór Asuntu Ekónomiku interinu no atuál Ministru Reforma Lejizlativa no Asuntu Parlamentár, Fidelis Manuel Leite Mangalhães. Imajen Tatoli/Egas Cristovão

DILI, 04 maiu 2020 (TATOLI) – Primeiru-Ministru (PM), Taur Matan Ruak konvoka reuniaun ho ministériu tékniku sira hodi aselera pakote ekonómiku ne’ebé sei atribui ba sidadaun sira iha períodu Estadu Emerjénsia ligadu ho surtu COVID-19 iha Timor-Leste.

Reuniaun ne’e hala’o iha salaun Ministériu Finansa, Aitarak-laran, segunda ne’e, ne’ebé partisipa hosi ministériu tékniku sira ne’ebé kompostu husi Ministra Finansa interina, Sara Lobo Brites, Ministru Koordenadór Asuntu Ekonómiku interinu, Fidelis Manuel Leite Magalhães, Ministra Solidariendade Sosiál no Inkluzaun, Armanda Berta dos Santos, Ministru Negósiu Estranjeiru no Kooperasaun, Díonisio Soares Babo, Ministru Saúde interinu, Bonifacío dos Reis Makoli, no ekipa Sentru Integradu Jestaun Krize (CIGC, sigla portugés).

“Objetivu husi reuniaun ida-ne’e maka atu haree ba prosesu administrativu hirak ne’ebé maka sei presiza atu finaliza lalais, ne’ebé konforme orientasaun Primeiru-Ministru nian atu ministériu sira tenke aselera prosesu administrativu hotu hodi rezolve emediatu atu labele husik sasán sira sein iha solusaun. Ho orientasaun ne’e ami sei halo koordenasaun di’ak liután ne’ebé natureza husi reuniaun ida-ne’e hanesan reuniaun tékniku ne’ebé lideradu husi Primeiru-Ministru”, informa Ministru Fidelis hafoin reuniaun.

Notísia Relevante: Xefe Estadu Promulga Dekretu-Lei 3 ba Apoiu Surtu COVID-19

Governante ne’e adianta, faze ida krusiál maka promulgasaun ba dekretu tolu kona ba pakote ekonómiku nian, ne’ebé Governu agradese ba Prezidente Repúblika ne’ebé promulga tiha ona dekretu sira ne’e no agora tama iha faze implementasaun husi dekretu ne’e.

“Iha asuntu balun sei presiza regulamentu despasu ministeriál, maibé ne’e la’ós komplesu, maibé hanesan buat ne’ebé ministériu implementadór presiza halo de’it diploma ka despasu ministeriál ida atubele fasilita implementasaun. Ezemplu ida mak hanesan kontribuisaun porsentu 60 ba traballadór sira ne’ebé mak Governu prevee atu inklui mós sira ne’ebé mak serbisu iha setór sira hanesan transporte públiku atu organiza di’ak liután prosesu rejistu ba sira no presiza despasu ministeriál ida, maibé ida-ne’e la’ós komplesu tanba kabe ba liña ministeriál atu halo hafoin efetua ninia implementasaun”, atuál Ministru Reforma Lejizlativa no Asuntu Parlamentár salienta.

Nia hatutan: “Ami fiar katak ministériu sira hotu halo hela ona levantamentu atu prepara dadus, lista uma ka’in sira ho rendimentu $500 mai kra’ik, inklui prosesu loke rejistu estraordináriu ba sira ne’ebé maka servisu iha setór hirak ne’ebé merese hetan kualifikadu atubele hetan apoiu. Kona-ba bainhira maka implementa apoia sira ne’e maka prosesu sira ne’e hotu sei implementa iha tempu badak”.

Nia subliña, Governu laiha intensaun atu prolonga prosesu sira ne’e tanba bainhira prolonga liu ninia efeitusei  laiha.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here