Portavóz CIGC, Odete da Silva Viegas. Imajen Tatoli/Egas Cristovão

DILI, 04 maiu 2020 (TATOLI) – Liuhosi Sala Situasaun, Portavóz Sentru Integradu Jestun Krize (CIGC, sigla portugés), Odete da Silva Viegas, informa pasiente COVID-19 ne’ebé sei baixa iha fatin izolamentu Vera Cruz mantein na’in-ualu, enkuantu totál negativu ba ohin loron kontinua sa’e ba 579 kompara ho horiseik ne’ebé hamutuk 533.

Enkuantu teste ba ohin loron sa’e ba 706, kompara ho horiseik ne’ebé ho totál teste hamutuk 688.

“Dadus totál kumulativu ba teste hamutuk 706 no totál númeru ne’ebé mak hein rezultadu laboratóriu hamutuk 103. Totál kazu konfirmadu mantein 24, kazu foun laiha, totál rezultadu laboratóriu negativu hamutuk 579, totál kazu rekuperadu nafatin 20”, dehan Portavóz CIGC iha Sala Sentru Mídia COVID-19 iha Sentru Konvensaun Dili (CCD, sigla portugés), segunda ne’e.

Nia adianta, ema ne’ebé baixa iha izolamentu agora hamutuk na’in-ualu no ema mate laiha, enkuantu totál profisionál saúde sira maka iha fatin kuarentena nafatin ema na’in-40.

Sira ne’ebé maka hela iha kuarentena no auto-kuarentena hamutuk 273, husi númeru ne’e kuarentena obrigatóriu hamutuk 212, kompostu husi iha Dili 171 no iha munisípiu 41, enkuantu auto-kuarentena hamutuk 71 maihusi munisípiu hotu no iha Dili laiha.

Númeru ne’ebé pasa ona loron 14 hamutuk 1.941, ne’ebé kompostu husi Dili 1.539 no munisípiu hamutuk 402.

“Hafoin kazu pozitivu dahuluk iha 21 marsu, kazu pozitivu ikus liu rejista iha 24 abríl ho totál konfirmadu na’in-24. Felizmente ita seidauk iha kazu pozitivu foun no iha fatin seluk kazu rekuperadu maka aumenta hamutuk 20 kazu”, Portavóz CIGC subliña.

Nia salienta, hafoin Estadu Emerjénsia faze dahuluk, konsege kontein ema ne’ebé maihusi li’ur ba fatin kuarentena no auto-kuarentena.

“Ita konsege kontrola no agora tama iha faze daruak Estadu Emerjénsia nafatin pontu entrada sira, hanesan aeroportu, portu, marrítima no terrestre nafatin taka atu fó liu biban ba Ministériu Saúde no liña ministériu sira, inklui CIGC atu prepara kondisaun di’ak liután, liu-liu forsa tarefa”, nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here